Soltústik Koreıa Japonııaǵa qaraı ballıstıkalyq zymyran ushyrdy
ASTANA. QazAqparat - Soltústik Koreıa ballıstıkalyq zymyran ushyrdy. Bul týraly ońtústikkoreıalyq resmı BAQ-tarǵa siltememen Bı-bı-sı habarlady.
Ionhap aqparat agenttiginiń málimeti boıynsha, qandaı túrge jatatyny anyqtalmaǵan zymyran Japon teńizine qaraı ornalasqan Phenan-Pýkto provıntsııasyndaǵy áýe bazasynan ushyrylǵan.
Reıter agenttiginiń habarlaýynsha, ońtústikkoreıalyq áskerıler onyń ushý jolyn baqylap otyrǵan jáne zymyran 500 shaqyrym jerge deıin ushqan.
Qazirgi ýaqytta zymyrannyń ushyrylý oqıǵasy AQSh-ta zerttelip jatyr.
KHDR basshysy Kım Chen Yn 1 qańtardaǵy teleúndeýi kezinde kontınentaralyq ballıstıkalyq zymyrandardy jasaýdyń sońǵy kezeńin bastaǵanyn aıtqan bolatyn.
