Soltústik Koreıa Japon teńizine qarata 30 zymyran ushyrdy

Bul týraly sheteldik BAQ ońtústikkoreılik «Renhap» agenttigine silteme jasap habarlady.

Taratylǵan aqparatqa qaraǵanda, zymyrandar shamamen 60 shaqyrym jerge ushyp baryp, teńiz ústine qulaǵan.

Sońǵy úsh apta boıy Soltústik Koreıa turaqty túrde zymyran ushyryp keledi. BAQ-tardyń habarlaýynsha, bul Ońtústik Koreıa men AQSh-tyń áskerı oqý-jattyǵýlaryna qarsy baǵyttalǵan narazylyq sharalary ispettes.

Aıta keteıik, osy aptanyń ishinde Ońtústik Koreıa KHDR-diń zymyrandardy synaqtan ótkizýin doǵarýdy talap etip, olardyń is-áreketterin arandatýshylyqqa ári áleýetti qaýipke baǵalaıtyndyqtaryn málimdegen bolatyn.

Degenmen, BUU-nyń Soltústik Koreıaǵa qarsy engizgen sanktsııa rejiminde qysqa qashyqtyqtaǵy zymyrandardy synaqtan ótkizýine tosqaýyl qoıý qarastyrylmaǵan.