Soltústik Koreıa tyńshy spýtnıkterdi synaqtan ótkizip jatqanyn málimdedi
ASTANA. QazAqparat – Soltústik Koreıa áskerı barlaý spýtnıgin synaqtan ótkizýdiń sońǵy kezeńi aıaqtalǵanyn habarlady. Eldiń ortalyq telegraf agenttiginiń málimetinshe, barlaý spýtnıgin synaqtan ótkizýdiń sońǵy kezeńinde sýret jáne aqparat jiberý múmkindigi tekserilgen. Bul týraly QazAqparat DW aqparat agenttigine silteme jasap habarlaıdy.
Spýtnıktiń ózi 2023 jyldyń sáýir aıynda tolyǵymen aıaqtalýy tıis.
Sonymen qatar, shamamen 500 km bıikke kóterilgen synaq jerserigi bar zymyran tasyǵyshtyń ushyrylǵany habarlandy.
Soltústik Koreıa mamandary aspaptar jumysyn ǵaryshta tekserip, spýtnıktik túsirilimderdi synaqtan ótkizdi.
Bir kún buryn Ońtústik Koreıa áskerıleri Soltústik Koreıadaǵy Koreı túbeginiń shyǵys jaǵalaýynan Japon teńizine qaraı eki ballıstıkalyq zymyran ushyrylǵanyn habarlady.
Boljam boıynsha, osy tıptegi zymyrandar ıadrolyq oqtumsyqtardy tasymaldaı alady jáne Japonııadaǵy nysanaǵa jetý úshin jetkilikti qashyqtyqtan óte alady.
Óz kezeginde Japonııa qorǵanys mınıstriniń orynbasary Tosıro Ino Soltústik Koreıanyń qaıta ushyrǵan ballıstıkalyq zymyrandary Japonııanyń erekshe ekonomıkalyq aımaǵynan (EEA) tys jerge qulaǵanyn málimdedi.
Onyń aıtýynsha, olar shamamen 550 shaqyrym bıiktikte jáne keminde 250 shaqyrym qashyqtyqqa ushyp kelgen.
Reuters habarlaýynsha, Soltústik Koreıa bıyl buryn-sońdy bolmaǵan zymyrandardy ushyrǵan: Phenıan jyl basynan beri 50-den astam zymyran synaqtaryn ótkizdi.
Buǵan qosa, halyqaralyq oqshaýlanǵan Soltústik Koreıadaǵy avtorıtarlyq rejım 2017 jyldan beri alǵash ret ıadrolyq synaqty qaıtadan ótkizýi múmkin degen qorqynysh kúsheıe tústi.
Foto: Heo Ran/ REUTERS
