Soltústik Koreıa túrmesinen bosatylǵan amerıkalyq stýdent qaıtys boldy
ASTANA. QazAqparat - Soltústik Koreıada nasıhattyq plakattardy urlady jáne eldiń bedelin túsirdi dep aıyptalyp 15 jylǵa sottalǵan amerıkalyq stýdent Otto Frederık Vombıer qaıtys boldy, dep habarlaıdy Lenta.ru.
Ol AQSh-ta kóz jumǵan. Qaıtys bolǵan jigittiń týystarynyń aıtýyna qaraǵanda, Vombıer Soltústik Koreıada túrmege túsken kezde jan men tán azabyn qatty tartqan. Dárigerler onyń bas súıegi qatty zaqymdalǵandyǵyn aıtqan. Ol jan-jaǵynda ne bolyp jatqandyǵyn jáne is-qımylyn baqylaý qabiletinen aıyrylǵan.
22 jastaǵy jas jigit bir jyldan asa ýaqyt komada jatqan.Resmı Phenıan botýlızm dertine shaldyqqan stýdenttiń uıyqtatatyn dárini qabyldaǵannan keıin jaǵdaıynyń nasharlaǵyndyǵyn habarlady.
Aıta keteıik, 15 jylǵa sottalǵan Vombıer Soltústik Koreıaǵa 2015 jyly 25 jeltoqsanda Beıjińnen týrıstik top quramynda kelgen. Ol 1 qańtar kúni sheteldik týrısterge arnalǵan «ıAngakto» qonaq úıiniń qyzmettik ǵımaratyna kirip, ilingen saıası plakattardy jyrtyp tastaǵan. Amerıkalyq stýdent óziniń kinásin tolyq moıyndap, saıası arandatýshylyqtarǵa tap bolǵandyǵyn aıtty. Vombıer maýsym aıynyń ortasynda densaýlyǵynyń nasharlaýyna baılanysty túrmeden bosatylǵan edi.
