Soltústik Koreıa taǵy da zymyran ushyrdy
SEÝL. YONHAP - QazAqparat – KHDR senbi tańynda Shyǵys teńizge taǵy da belgisiz snarıadtar ushyrdy, dep habarlaıdy QazAqparat Yonhap agenttigine silteme jasap.
Shtab bastyqtary birikken komıtetiniń málimdemesine qaraǵanda, zymyrandar Ońtústik Hamgeng provıntsııasynyń Hamhýng qalasynan ushyrylǵan. Budan basqa aqparat joq.
«Biz ár jaǵdaıǵa daıyn bola otyryp, endigi zymyrandardyń ushyrylýyn úzbeı ańdyp otyrmyz», - delingen Komıtettiń málimdemesinde.
Osydan tórt kún buryn, KHDR Shyǵys teńizde taǵy eki zymyran ushyrdy. Olar jaqyn qashyqtyqqa atylatyn KN-23 ballıstıkalyq zymyrandary bolýy ábden múmkin.
Phenıan jarty aıdyń ishinde osymen besinshi márte zymyran ushyrdy. Zymyrandardyń alǵashqy legi 25 shilde kúni ushyrylǵan.
Phenıan Ońtústik Koreıa men AQSh arasynda ótip jatqan birlesken áskerı oqý-jattyǵýlarǵa osylaı narazylyq tanytyp otyr, dep jazdy Yonhap.
Seýl men Vashıngton birikken jazǵy áskerı jattyǵýlardy dúısenbi kúni bastady. KHDR muny shabýyl jasaýdyń daıyndyǵy dep sanap, ony toqtatýdy talap etip otyr.
Donald Tramp Aq úıde ótken jýrnalıstermen kezdesýde KHDR basshysymen taǵy da kezdesýi múmkindigin bildirdi. Budan bólek, Tramp ushyrylǵan zymyrandardyń ballıstıkalyq zymyran emes ekendigin aıtty. «Sońǵy ushyrylǵandardyń barlyǵy – jaqyn qashyqtyqqa atylatyn snarıadtar. Olar ballıstıkalyq zymyran ushyrǵan joq», - dedi Tramp.
