Soltústik Koreıa súńgýir kemesinen ballıstıkalyq zymyran ushyrdy
ASTANA. QazAqparat - Soltústik Koreıa jeltoqsanda teńiz astynan ballıstıkalyq zymyran ushyrýdy synap kórdi. Ońtústikkoreıalyq Yonhap agenttigi Qorǵanys mınıstrligine silteme jasaı otyryp synaqtyń sátsiz ótkendigin habarlady.
"Biz ótken aıda Soltústik Koreıanyń sý astynan ballıstıkalyq zymyran ushyrylymynyń synalýyn anyqtadyq", - dep málimdegen agenttikke derekkóz. Onyń málimetinde, "taldaý qorytyndysyna sensek, ushyrylym oıdaǵydaı aıaqtalmaǵan", dep kórsetilgen.
Qorǵanys salasynyń qyzmetkeri aqparat agenttigine Soltústik Koreıanyń teńizdegi ballıstıkalyq zymyran jasaý úshin barynsha tyrysyp jatqandyǵyn atap ótken.
Amerıkalyq basylym Washington Free Beacon keshe osy oqıǵa boıynsha, ushyrylymnyń 21 jeltoqsanda ótkendigin habarlady. Zymyran Japon teńizindegi Soltústik Koreıanyń Sınpho portynda súńgýir kemeden ushyrylǵan. Basylym silteme jasaǵan áskerıler synaqtyń sátti ótkendigin málim etken.
Vashıngtondaǵy Amerıka-koreı ınstıtýty synaqtyń jalǵasyp kele jatqandyǵyn málim etti. Ǵylymı ortalyqtyń qorytyndysynda spýtnıkten túsirilgen sýretter usynylǵan. Amerıkalyq sarapshylar sýretterdi taldaı kele «21 jeltoqsanda Soltústik Koreıa "Sınpho" súńgýir kemesinen KN-11 ballıstıkalyq zymyranyn ushyrýǵa áreket jasaǵan» degen tujyrymǵa kelip otyr. Batystyq derekkózderdiń máimeti boıynsha, bul oqıǵadan bir aı buryn KHDR sý astynan zymyran ushyrýǵa árekettenip sátsizdikke ushyraǵan. Sol joly "Kore" (Kıt) súńgýir kemesine zaqym kelgen bolatyn.
