Soltústik Koreıa óziniń jalǵyz ıadrolyq polıgonyn jaryp jiberdi
PHÝNGERI. QazAqparat - Beısenbi kúni Soltústik Koreıa jalǵyz ıadrolyq polıgonyn buzyp, ıadrolyq áleýetin joıýǵa alǵashqy qadam jasady, dep habarlaıdy Renhap agenttigi.
Jergilikti ýaqyt boıynsha tańǵy 11 shamasynda Phýngerı polıgonynyń soltústik bóligindegi No.2 jerasty joly jaryldy. Qalǵan eki týnnel Phenıan ýaqytymen kúndizgi 2:17-de joıyldy. Sondaı-aq kazarma ǵımarattary, sholý munaralary jáne polıgon aýmaǵyndaǵy basqa da nysandar jarý jolymen joıyldy.
Phenıannyń shaqyrýymen demontajdaý rásimine AQSh, Qytaı, Reseı jáne Ulybrıtanııa telearnalarynyń ókilderi men jýrnalıster qatysty.
Polıgonnyń buzylýyna kýá bolǵan jýrnalısterdiń aıtýynsha, qoparý jumystary keshe keshkisin 4:17-de toqtatylǵan. №1 týnneldiń demontajdalýy týraly ázirge aqparat joq.
Ońtústik Koreıa úkimeti bul oqıǵany jyly qabyldap, Koreı túbegin ıadrodan tazartý protsesiniń ary qaraı jalǵasýyna úmit bildirdi.
«Biz bul oqıǵa aldaǵy ýaqytta túbekti ıadrodan tolyqtaı tazartýdyń bastamasy bolady degen oıdamyz», - dep málimdedi Ońtústik Koreıa Syrtqy ister mınıstrliginiń resmı ókili.
Soltústik Koreıa buqaralyq aqparat quraldary bul oqıǵa týraly ázirge únsiz otyr. Polıgondy buzý sharasyna memleket basshysy Kım Chen Ynnyń barǵan-barmaǵany týraly aqparat joq.
