Soltústik Koreıa men Ońtústik Koreıa kemeleriniń arasyndaǵy qarýly qaqtyǵys kezdeısoq oqıǵa - Koreıa Respýblıkasynyń premeri
ASTANA. Qarashanyń 11-i. QazAqparat - Seısenbi kúni Sary teńizde Koreıa Halyq Demokratııalyq Respýblıkasy men Ońtústik Koreıa áskerı katerleriniń arasynda oryn alǵan qarýly qaqtyǵys kezinde
Koreıa Respýblıkasynyń áskerı-teńiz kúshteri eshqandaı shyǵynǵa ushyraǵan joq, esesine soltústikkoreılik keme «biraz zaqymdandy». Bul týraly Ońtústik Koreıa áskerı-teńiz kúshteriniń resmı ókili málim etti, dep habarlaıdy ITAR-TASS agenttigi.
«Ol jaqyn qashyqtyqtaǵy qaqtyǵys bolǵan joq. Biz soltústikkoreılik kemedegilerdiń bastaryn kótertpeı, oq jaýdyrdyq», degen ofıtser, munyń sońǵy 7 jylda soltústikkoreılik tarappen bolǵan birinshi qarýly qaqtyǵys ekenin aıtyp otyr.
Álemdik buqaralyq aqparat quraldary osynyń aldynda Sary teńiz aıdynynda Koreı Halyq Demokratııalyq Respýblıkasy men Ońtústik Koreıanyń áskerı kemeleriniń arasynda atys bolǵanyn habarlaǵan bolatyn.
Koreıa Respýblıkasy Qorǵanys mınıstrliginiń resmı ókiliniń aıtýynsha, soltústikkoreılik sholǵynshy kateri Pennendo araly mańynda teńizdegi shekarany buzǵan. Sondyqtan ońtústikkoreılik keme oǵan eskertý retinde oq atýǵa májbúr bolǵan. Soltústik Koreıa kateri de olarǵa oqpen jaýap qaıtarǵan.
Koreıanyń Ortalyq telegraftyq agenttigi taratqan Koreı halyq armııasy joǵarǵy qolbasshylyǵynyń málimdemesinde aıtylǵandaı, Soltústik jáne Ońtústik Koreıanyń sholǵynshy kemeleri atysqan qarýly qaqtyǵys ońtústikkoreılik taraptyń «arandatýshylyq áreketi» bolyp tabylady.
Sary teńizde Soltústik Koreıa men Ońtústik Koreıa kemeleriniń arasynda oryn alǵan qarýly qaqtyǵys kezdeısoq oqıǵa. Bul týraly Koreıa Respýblıkasynyń premeri Chon Ýn Chhan el parlamentinde depýtattarǵa málim etti. Ulttyq qaýipsizdik keńesiniń shuǵyl shaqyrylǵan jınalysynda el prezıdenti Lı Men Bak oryn alǵan oqıǵaǵa «sabyrlylyq» tanytýdyń qajettiligin atap kórsetip, áskerılerdi onsyz da kúrdeli jaǵdaıdy, ýshyqtyrmaýǵa shaqyrdy.
