Soltústik Koreıa ekinshi ıadrolyq sammıttiń esh kelisimsiz aıaqtalǵanyn aıtty
ASTANA. QazAqparat Soltústik Koreıa AQSh prezıdenti Donald Tramppen kezdesýden bir apta ýaqyt ótken soń ekinshi ıadrolyq sammıttiń nátıjesiz aıaqtalǵanyn habarlady.
The New York Times basylymynyń jazýynsha, Soltústik Koreıa Kım Chen Yn men Donald Tramptyń kezdesýi esh kelisimsiz aıaqtalǵanyn jáne Soltústik buǵan AQSh-ty kinalaıtynyn aıtty.
«Osy kúnge deıin Soltústik Koreıanyń buqaralyq aqparat quraldary 27-28 aqpanda Vetnamda ótken Kım Chen Yn men Donald Tramptyń kezdesýiniń sátsiz aıaqtalǵany týraly eshteńe jazbaǵan edi. Sammıttiń sátsizdigi Kım úshin úlken jeńilis, al ol Tramptan Soltústik Koreıany BUU sanktsııalarynan bosatýdy talap etken edi», dep jazady basylym.
«Soltústik Koreıa halqy Kım Chen Yn men Donald Tramptyń ekinshi kezdesýi joǵary deńgeıde ótip, jaqsy nátıje beredi dep úmittengen edi. Degenmen, kezdesý esh kelisimsiz aıaqtalǵan soń, halyqtyń eńsesi túsip ketti. Kópshiligi bul Amerıka Qurama Shtattarynyń jaýapkershiliginde ekenin aıtýda», dep jazyp jatyr Soltústik Koreıa basylymdary.
Aıta ketý kerek, BUU sanktsııalary Soltústik Koreıanyń ekonomıkasyna aýyr soqqy boldy. Al ekinshi ıadrolyq sammıtte Soltústik Koreıa ıadrolyq qarýdy demontajdaý baǵdarlamasyn júzege asyrý úshin negizgi sanktsııalardy alyp tastaýdy suraǵan edi. Sammıt sátsiz aıaqtalsa da, Soltústik Koreıa basylymdary Kımniń álemdik arenadaǵy sózderin jarysa jazyp, sátsizdik týraly jaq ashpaǵan bolatyn.
Sarapshylar bir aptadan soń osyndaı materıaldardyń paıda bola bastaǵanynyń artynda ne turǵanyn oılap alańdaýshylyq bildirip otyr.
