Soltústik Koreıa arandatýshylyq jasaǵan jaǵdaıda AQSh áýe kúshterine ıadrolyq soqqy beremiz dep qorqytty
ASTANA. QazAqparat - Azııa-Tynyq Muhıt aımaǵynda arandatýshylyq jasaǵan jaǵdaıda KHDR AQSh áýe kúshterine ıadrolyq soqqy berýge daıyn. Bul jóninde TASS agenttigi habarlady.
«Eskertý soqqysyn jasaý quqyǵy AQSh monopolııasy emes. Koreı halyq áskeriniń jedel bólimsheleri jaý tarapynan záredeı arandatýshylyq baıqasa, aıaýsyz soqqy berýge daıyn», - delingen habarlamada.
Koreıa ortalyq telegraf agenttiginiń pkirinshe, Ońtústik Koreıa aýmaǵyna THAAD amerıkandyq zenıtti-zymyran kesheniniń batareıasyn ornalastyrý jáne Pentagonnyń Gýam araldaryna ıadrolyq qarý tasıtyn úsh B-2 Spirit strategııalyq bombalaýshylaryn jiberýi - KHDR aýmaǵyn qarýly basyp alý josparynyń bir bóligi.
6 qańtar kúni KHDR ıadrolyq synaq júrgizip, 7 aqpanda BUU Qaýipsizdik Keńesiniń qararyn buzatyn jasandy Jer serigi bar tasyǵysh-zymyran ushyrǵannan keıin Koreı túbegindegi jaǵdaı shıelenisip ketti. Qarymta retinde Qaýipsizdik Keńesi Phenıanǵa qatysty sanktsııany kúsheıtý týraly biraýyzdan qarar qabyldady. KHDR ıadrolyq synaqty AQSh basqynshylyq saıasatynan qorǵaný úshin ótkizdik dep bul qarardy qabyldamaı otyr, al tasyǵysh-zymyrandy ǵaryshty zertteý maqsatynda ushyrǵanyn aıtýda.
