Soltústik Koreıa AQSh-pen sammıtke qatysýyn qaıta qarastyrýy múmkin ekenin málim etti
SEÝL. QazAqparat - Soltústik Koreıa Vashıngton Phenıanǵa qatysty jaýlasý saıasatyn toqtatpasa, Amerıka Qurama Shtattarymen sammıtke qatysýyn qaıta qarastyrýy múmkin, dep málim etti beısenbi kúni Soltústik Koreıa Syrtqy ister mınıstriniń orynbasary. Bul týraly Renhap agenttigi habarlaıdy.
Koreı ortalyq aqparat agenttiginde jarııalanǵan málimdemede Soltústik Koreıa Syrtqy ister vıtse-mınıstri Chhve Son Hı 12 maýsymda bolatyn Kım Chen Yn men Donald Tramp arasyndaǵy kezdesýdiń qandaı deńgeıde ótetini AQSh-qa baılanysty ekenin málim etti.
«Biz AQSh-ta kelissózder ústelinde ne ıadrolyq maıdanda jolyǵamyz ba, ola Vashıngtonnyń sheshimderine baılanysty. AQSh bizdiń qalaýymyzdy elemeı, zańsyz ári kóńilge qonymsyz áreketterin jalǵastyra beretin bolsa, men bizdiń basshylyqqa Soltústik Koreıa men AQSh arasyndaǵy samıtti ótkizý týraly sheshimdi qaıta qaraýǵa usynys bildiremin» , - dedi Chhve.
Ońtústik Koreıa prezıdenti Mýn Chjı En men Donald Tramp arasynda seısenbi kúni Vashıngtonda ótken kezdesýden keıin Phenıan qoqan-loqy jasady. Kezdesý barysynda Tramp Soltústik Koreıamen 12 maýsymǵa josparlanǵan sammıttiń ótpeı qalýy yqtımal ekenin aıtty.
Vashıngton Phenıandy ıadrolyq baǵdarlamadan birjaqty bas tartýǵa májbúrledi dep Soltústik Koreıa AQSh-qa narazylyǵyn bildirdi. Sebebi Tramptyń ákimshiligi Soltústik Koreıanyń ıadrolyq baǵdarlamasyn tolyq joıýǵa umtylatynyn jetkizdi. Phenıan máseleniń qadamdyq sheshimin qalaıdy jáne taraptardan sheginýdi kútip otyr.
Ótken aptada Soltústik Koreıa Syrtqy ister mınıstiniń birinshi orynbasary Kım Ge Gvannyń aıtýynsha, Soltústik Koreıa ıadrolyq arsenalynan birjaqty tártipte bas tartqyzatyn qandaı da bir kelissózderden múddeli emes.
Sonymen qatar, Syrtqy ister mınıstri Chhve AQSh-tyń vıtse-prezıdenti Maık Pensti jaqynda bergen suhbatynda lıvııalyq ádispen Soltústik Koreıa máselesin áskerı túrde sheshý múmkindigi týraly aıtqany úshin synǵa aldy. Ol Phenıanmen kelissóz júrgizýge nıet bildirgen Vashıngtonnyń dál ózi ekenin eske salyp, Soltústik Koreıa men Lıvııany salystyrmaýdy talap etti.
