Soltústik Koreıa AQSh-qa qyr kórsetti
ASTANA. 29 naýryz. QazAqparat - Soltústik Koreıa prezıdenti Kım Chen Yn eldiń qarýly kúshterine "Ońtústik Koreıa men Tynyq muhıty aýmaǵynda ornalasqan AQSh áskerı bazalaryna zymyrannan soqqy berýge daıyndala berýdi" buıyrdy.
Soltústik Koreıa memlekettik telearnalarynyń habarlaýynsha, prezıdent jarlyǵynda "amerıkalyq ımperıalıstermen esep aıyrysatyn kez keldi" degen.
Buǵan deıin AQSh Ońtústik Koreıamen birlese ótkizgen áskerı jattyǵýy kezinde osy el ústinen eki bombalaýshy ushaǵyn ushyrǵan edi, dep habarlaıdy «Azattyq».
Sońǵy aptalarda Phenıan "AQSh pen Ońtústik Koreıaǵa ıadrolyq soqqy beretinin" aıtyp, doq kórsetip keledi.
27 naýryzda Soltústik Koreıa bıligi soǵystyń kez kelgen ýaqytta bastalyp ketýi múmkin ekenin málimdegen. Phenıan naýryzdyń ortasynda "Seýlmen arada 1953 jyly jasalǵan, soǵysty toqtatý týraly bitimnen bas tartatynyn" da eskertken.
