Soltústik Qazaqstannyń jańa prokýrory urlyq kólemin 50% azaıtýǵa ýáde berdi
PETROPAVL. QazAqparat - Soltústik Qazaqstan oblysynyń jańadan taǵaıyndalǵan prokýrory Berik Asylov respýblıkalyq jáne aımaqtyq BAQ ókilderimen kezdesti, dep habarlaıdy «QazAqparat» HAA tilshisi.
Ol jumys josparlary týraly baıandap, oblystaǵy krımınogendi jaǵdaı týraly saraptama qorytyndylarymen bólisti. Berik Asylov qylmys arasynda urlyqtyń kóbeıgenin atap ótti. Jyl basynan beri jasalǵan 1917 qylmystyń 1126-sy urlyq bolyp shyqqan.
«Men urlyq sanyn 50% tómendetýdi basty maqsat etip qoıyp otyrmyn, osylaısha qylmys deńgeıin túsirýge bolady. Ótken jyly SQO-da jasalǵan qylmystyń 60% urlyq quraıdy. Máselen, birinshi toqsanda jasalǵan 1917 qylmys ishinde 1126 urlyq bar. Olardyń sanyn azaıtýǵa bolady, ol úshin túrli quraldar bar, máselen, onlaın-beınebaqylaý. Dál osyndaı jumyspen ózge aımaqta tájirıbe jınaqtaǵanmyn», - dedi SQO prokýrory.
Taǵy bir másele - bıznesti qorǵaý. Oblys prokýrory kásipkerlikti damytýdyń óńirlik ekonomıkalyq jaǵdaıyna oń yqpal etetinine senimdi. Bıznes belsendiliginiń ósýi jańa jumys oryndaryn ashýǵa múmkindik beredi. Jumyssyzdyqty azaısa, qylmys sany da azaıady. Statıstıkaǵa sáıkes, SQO-da kóbinese turaqty jumysy joqtar men esirtkige táýeldiler qylmysqa barady.
