Soltústik Qazaqstannyń Tereńkól kólinde balyq qyryldy

PETROPAVL. QazAqparat – Soltústik Qazaqstan oblysy Aqqaıyń aýdanyndaǵy Tereńkólde balyq qyryldy. Mamandar qazirgi ýaqytta balyqtyń óleksesi men sý synamasyn zertteýge jiberdi, dep habarlaıdy QazAqparat tilshisi.

SQO ekologııa departamenti baspasóz qyzmetiniń málimetinshe, Aqqaıyń aýdany Tereńkólde 25 sáýir kúni balyq qyrylý faktisi tirkelgen.

Osyǵan oraı ózara is-qımyl shemasyna sáıkes oqıǵa ornyna ekologııa departamenti, Esil oblysaralyq basseındik balyq sharýashylyǵy ınspektsııasy, SQO tabıǵı resýrstar jáne tabıǵat paıdalanýdy retteý basqarmasy, Aqqaıyń aýdanynyń veterınarııa qyzmeti mamandary jáne «NPTs RH» JShS qyzmetkerleri attandy.

Balyqtyń qyrylý sebebin anyqtaý úshin ólgen balyqtyń ushasy men sý synamasy alyndy.

«Esil oblysaralyq basseındik balyq sharýashylyǵy ınspektsııasy» RMM málimetinshe, Tereńkólde balyqtyń qyrylǵany jaıly habar olarǵa WhatsApp arqyly túsken.

«Tereńkólde móńke balyǵy qyrylǵan. Ólgen 100 kg balyqty jınap, joıý jumysyn uıymdastyrdyq. Aldyn ala boljam boıynsha, taıaz kól qysta túbine deıin qatyp, sý jándikteri aýa jetpeı tunshyǵyp ólgen» dep habarlady mekemeden.

Tereńkól kóli Aqqaıyń aýdanyndaǵy Aralaǵash aýylyna 4,5 km jetpeı ornalasqan.

286 ga aýmaqty alyp jatyr, tereńdigi - bar bolǵany 1,5 m. Kásipshilik balyq aýlaý úshin «Zenchenko ı K» seriktestigine bekitilgen eken.

Byltyr SQO kólderinde 7 ret balyq qyrylý deregi tirkelgen.