Soltústik Qazaqstannyń Novoıshım aýylynda tótenshe jaǵdaı jarııalanady

ASTANA. QazAqparat – Qatty jelden áleýmettik nysandary zardap shekken Soltústik Qazaqstan oblysyndaǵy Novoıshım aýylynda tabıǵı sıpattaǵy tótenshe jaǵdaı jarııalanbaq, dep habarlaıdy QazAqparat tilshisi.

«Soltústik Qazaqstan oblysy Ǵabıt Músirepov aýdany Novoıshım aýylynyń aýmaǵynda jergilikti aýqymdaǵy tabıǵı sıpattaǵy tótenshe jaǵdaı jarııalansyn. Ǵabıt Músirepov atyndaǵy aýdan ákiminiń orynbasary E.Q.Amanjolov tótenshe jaǵdaıdy joıý basshysy bolyp taǵaıyndalsyn. Osy sheshim alǵashqy resmı jarııalanǵan kúninen bastap qoldanysqa engiziledi jáne 2023 jylǵy 23 tamyzda týyndaǵan quqyqtyq qatynastarǵa qoldanylady», - dep jazylǵan Ashyq NQA portalynda jarııalaǵan aýdan ákimi Rýslan Ańbaevtyń sheshim-jobasynda.

Aıta keteıik, 23 tamyzda Soltústik Qazaqstan oblysyna qarasty Novoıshım aýylynda qatty jel turyp, ǵımarattyń syrtqy qasbetin zaqymdap, kópqabatty turǵyn úıdiń shatyryn ushyryp áketkenin jazyp edik.

Osyǵan baılanysty eldi meken aýmaǵynda tótenshe jaǵdaı jarııalaý sheshimi qabyldanyp otyr.

ıAǵnı, osydan keıin ǵana nysandarǵa kelgen shyǵyndy esepteý, zalaldy óteý jáne jóndeý jumystary júredi.