Soltústik Qazaqstannyń aýyldaryna 3 myń úı salynady
PETROPAVL. QazAqparat - Soltústik Qazaqstan oblysynyń aýyldarynda úsh jylda 3 myń úı boı kóteredi, dep habarlaıdy QazAqparat aımaq ákimdigine silteme jasap.
SQO ákimi Qumar Aqsaqalov ákimdik keńesinde málim etkendeı, turǵyn úıler biryńǵaı sáýlet úlgisinde salynady. Barlyq aýdandar bekitilgen nobaılarmen jumys jasaýlary kerek. 3 myń úıdiń qurylysy eńbek resýrstaryn tartý maqsatynda qolǵa alynbaq.
«Biz úılerdiń birneshe nusqasyn bekittik. Sol arqyly qurylys júrgizý kerek. Arnaıy komıssııa barlyǵyn tekseretin bolady. Bıyl 100 úı, kelesi jyly 600 úı boı kóteredi. 2020 jyly - 1000, 2021 jyly 1400 úı salynady. Bıýdjette aqsha qarastyrylǵan», - dedi Qumar Aqsaqalov.
Óńir basshysy aýdan ákimderine daıyndyq jumystaryn júrgizýdi tapsyrdy. Bul - tehnıka, qurylys materıaldary jáne qurylysshylardyń jetkilikti bolýy.
