Soltústik Qazaqstannyń 2 eldimekeninde karantın sharalary kúsheıtildi
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, Maǵjan Jumabaev aýdanynyń Vozvyshenka jáne Qaraqoǵa eldimekenderinde qosymsha shekteý sharalary engizildi.
Máselen Vozvyshenka eldi mekeninde 8 qańtardan beri KVI juqtyrýdyń 6 jaǵdaıy tirkelgen.
M.Jumabaev aýdany bas sanıtar dárigeriniń qaýlysyna saı, Vozvyshenka eldi mekeninde adamdardyń aýylǵa kirip-shyǵýyna, onyń ishinde kóshede jaıaý júrýine shekteý qoıyldy. Bul shekteýlerdiń halyqtyń tirshiligin qamtamasyz etý uıymdarynyń qyzmetkerlerine, medıtsınalyq kórsetkishter boıynsha emdeý mekemelerine baratyn turǵyndarǵa, sondaı-aq eldi mekenniń tynys-tirshiligin qamtamasyz etýge arnalǵan kásiporyn-mekeme qyzmetkerlerine qatysy joq.
Sondaı-aq tranzıttik avtokólikter, aýyl sharýashylyǵy tehnıkasy, ózge de taýar tıelgen júk kólikteri esh kedergisiz júredi.
Azyq-túlik dúkenderi jumysy saǵat 8.00-den 22.00-ge deıin shektelse, basqa saýda oryndary dúısenbi-juma kúnderi saǵat 8.00-den 19.00-ge deıin ashylyp, al demalys jáne mereke kúnderi jumysyn toqtatady.
Turǵyndarǵa jaqyn mańdaǵy dúkenge, dárihanaǵa jáne jumysqa barýǵa ǵana ruqsat. Tańǵy saǵat 8.00-den 21.00-ge deıin halyqtyń aýyl ishinde júrýine shekteý qoıylǵan.
65 jastan asqandarǵa da dalaǵa shyǵýǵa shekteý qoıyldy, olarǵa qajetti dári-dármek, azyq-túlik jetkizilip beriledi.
Al saǵat 19.00-den keıin jasóspirimderdiń eresekterdiń qaraýynsyz kóshege shyǵýyna tyıym salyndy.
COVID-19 juqtyrǵandar jáne olarmen baılanysta bolǵandar úı karantınin saqtaýǵa mindetteledi. Muny jergilikti polıtsııa baqylaýǵa alady.
Vozvyshenka eldimekeninde karantındik shekteýler 25 qańtar saǵat 16.00-den bastap kúsheıtildi.