Soltústik Qazaqstannan qonys aýdarǵandar Reseı men Germanııaǵa ketýde
ASTANA. QazAqparat - 2017 jylǵy qańtar-qyrkúıekte Soltústik Qazaqstan oblysynan 9516 adam kóship ketken. Onyń 6979-y - Qazaqstannyń basqa óńirlerine, 2359-y - TMD elderine jáne 178-i álemniń basqa elderine qonys aýdarǵan. Osy ýaqyt aralyǵynda Soltústik Qazaqstanǵa 5273 adam kerisinshe, kóship kelgen. Olardyń 4664-i Qazaqstannyń basqa óńirlerinen, 554-i TMD elderinen jáne 55 adam álemniń basqa elderinen kelgen. Bul týraly SQO Statıstıka departamentinen málim etti.
Ótken jyldyń sáıkes kezeńimen salystyrǵanda TMD elderinen Soltústik óńirge kóship kelgender sany - 19,1%, ketkender sany 4,3% artty.
«Bizdiń oblystan shyqqan emıgranttardyń negizgi bóligin Reseı Federatsııasy (barlyq ketkenderdiń 99%) qabyldaıdy. TMD elderinen oblysqa kelgenderdiń ishinen 2017 jylǵy qańtar-qyrkúıekte eń úlken úles salmaqty Reseı Federatsııasynan (TMD-dan barlyq kelgenderdiń 78%-y) jáne Tájikstannan (8,7%) kelgender quraıdy», - delingen taratylǵan aqparatta.
Alys shet elderden oblysqa kelgenderdiń arasynda Qytaı mıgranttary - 21 adamdy, Germanııa - 13 adamdy, Monǵolııa 8 adamdy quraıdy. Germanııa oblys turǵyndarynyń negizgi emıgratsııa eli bolyp qalýda, onda emıgranttardyń 64% nemese 114 adam qonys aýdardy.
