Soltústik Qazaqstanǵa Reseıden gýmanıtarlyq kómek keldi

PETROPAVL. QazAqparat – Soltústik Qazaqstan oblysyna Reseıden jeke qorǵanysh quraldary, dári-dármek bar gýmanıtarlyq kómek jetti, dep habarlaıdy QazAqparat tilshisi.

SQO-ǵa Reseıden jetkizilgen gýmanıtarlyq kómektiń ishinde 2 600 dana qorǵanysh kostıými, 21 myńnan astam maska bar. Qaýipti vırýspen kúreske arnalǵan «Koronavır» preparatynyń 230 qoraby da jetkizildi.

Gýmanıtarlyq kómekti sybaılas jemqorlyqqa qarsy qyzmet jáne qoǵam ókilderi Petropavlda qarsy alyp, júktiń tıisti jerge jetýin qadaǵalaıtyn boldy.

«Densaýlyq saqtaý basqarmasyna tapsyramyz. Olar emdeý mekemelerine qajetine qaraı tegin úlestirip beredi. Reseıden jetkizilgen ár buıymǵa mór tańba basamyz. Bul - taýar satylmaıdy, syrqat pen medıtsınalyq qyzmetkerlerge tegin berilýi kerek degendi bildiredi», - deıdi QR Sybaılas jemqorlyqqa qarsy is-qımyl agenttigi SQO boıynsha departament basshysynyń birinshi orynbasary Nurlan Jahın.