Soltústik Qazaqstanǵa Irlandııadan 800 bas mal ákelinedi
PETROPAVL. QazAqparat – Bıyl Soltústik Qazaqstan oblysyna alys jáne jaqyn shetelderden úsh myńǵa jýyq mal ákelindi, dep habarlaıdy QazAqparat.
Ákimdik otyrysynda aýmaqtyq veterınarlyq baqylaý jáne qadaǵalaý ınspektsııasynyń basshysy Marat Ibraev 33 sharýa qojalyq mal ákelgenin aıtty. Onyń 30-y veterınarlyq talaptarǵa sáıkes karantınnen ótse, qalǵan 3-eýi karantınge alyndy.
«Jyl aıaǵynda deıin 9 aýdandaǵy 20 sharýa qojalyq alys jáne jaqyn sheteldiń 7 elinen 3 myńǵa jýyq iri qara mal ákelýdi josparlap otyr. Іri jobalardyń biri – «Zenchenko men K» komandıttik seriktestiginiń Germanııadan 600 bas mal alyp kelýi. Kelesi dúısenbide olardy karantınge qoıady. «Zagradovskoe» JShS Avstrııadan 407 mal basyn, al «Joldasbaı Agro» Irlandııadan 820 bas mal ákeledi. Biz Tatarstanmen, Chehııamen, Slovenııamen jáne Avstralııamen jumys isteımiz», - deıdi M.Ibraev.
Ol kórshiles Reseıdiń birqatar mal aýrýlary boıynsha sátsiz bolǵan aımaqtary týraly aıtty. Onyń aıtýynsha, Nazyvaeskıı aýdanynda iri qara mal qutyrma aýrýymen aýyrǵanyn, Omby oblysynda jylqylar ınfektsııalyq anemııamen, nodýlıarly dermatıt aýrýlarymen aýyrǵany týraly málim etti. Sondaı-aq, ol Ýdmýrtııa Respýblıkasy, Novosibir, Saratov oblystarynda nodýlıarly dermatıt boıynsha jaǵdaı jaqsy emes ekenin tilge tıek etti.
«Omby jáne Túmen oblystary shekarasynda bizdiń qyzmet ýaqytsha joqtyǵyn eskere otyryp, M. Jumabaev, Ýálıhanov aýdandary ákimderiniń shekara qyzmetimen jumys isteýge jáne ózara baılanysta bolýǵa erekshe nazar aýdarýlaryn suraımyn», - deıdi ol.
