Soltústik Qazaqstandaǵy reseılik týrıster aǵyny eki esege ulǵaıdy
PETROPAVL. QazAqparat - Petropavlda eki kúnnen keıin «Qazaqstan men Reseıdegi týrızmdi damytýdyń jańa tásilderi men úrdisteri» týrıstik kórmesi ashylady, dep habarlaıdy QazAqparat tilshisi.
Óńirlik kommýnıkatsııalar qyzmeti atap ótkendeı, XV Qazaqstan men Reseıdiń aımaqaralyq yntymaqtastyǵy forýmy aıasyndaǵy kórmeni ótkizýge barlyǵy daıyn. Ol jaqynda ashylǵan ámbebap tennıs ortalyǵynda ashylady.
Soltústik Qazaqstan oblysy ákiminiń orynbasary Dáýren Jandarbektiń aıtýynsha, forým - eń aldymen, tájirıbe almasý.
«Kórmede Qazaqstannyń 10 týrıstik destınatsııasy kórsetiledi. Sondaı-aq golografııalyq shoýdy tamashalaýǵa bolady.Al 8-9 qarashada Qazaqstan men Reseı óńirleriniń týrıstik áleýeti usynylady. Qazaqstan jáne Reseı Kásipkerler palatasy aıasynda óńiraralyq keńestiń otyrysy ótedi», - dedi D.Jandarbek.
Soltústik Qazaqstan oblysynan Imantaý-Shalqar kýrorttyq aımaǵy tanystyrylady. Kýrort eldi týrıstıfıkatsııalaý kartasy áleýettik jobalarynyń TOP-10-na engizilgen. D.Jandarbektiń aıtýynsha, bıyl Reseıden keletin týrıster sany eki esege artqan.
7 qarashada qala turǵyndary men qonaqtary úshin kórme ashylyp, qoıylymdar men kontsertter ótedi. Mýzeıler men kitaphanalar jumys isteıdi.
