Soltústik Qazaqstandaǵy kásiporyndardyń úshten birin áıelder basqarady
PETROPAVL. QazAqparat - Soltústik Qazaqstan oblysynda shaǵyn jáne orta bıznestiń 28 myńnan astam sýbektileri bar, dep habarlaıdy «QazAqparat» HAA statıstıka departamentine silteme jasap.
Statıstıkterdiń málimetteri boıynsha, bul kórsetkishtiń 72,1%-i jeke kásipkerlerge, 16,6%-i zańdy tulǵalarǵa, 11,3%-i sharýa qojalyqtaryna nemese fermerlik sharýashylyqtarǵa tıesili.
Negizinen soltústikqazaqstandyq kásipkerler kóterme jáne bólshek saýdamen avtokólikti jóndeýmen, aýyl, orman jáne balyq sharýashylyǵymen aınalysyp, ónerkásip jáne qurylys salasynda jumys isteıdi. Birinshi jartyjyldyqta shaǵyn jáne orta bıznes sýbektileri 154 mlrd teńgeden astam somaǵa ónimder shyǵaryp, ártúrli qyzmetter kórsetken. Óndiris kólemi ótken jyldyń osy kezeńimen salystyrǵanda 12,1%-ke artty.
«Qazir áıelderdiń basshylyǵyndaǵy kásiporyndar men uıymdardyń kórsetkishi 27,3%-ti quraıdy. Áıelder basshylyq etetin salalarǵa mynalar jatady: bilim berý, qarjy jáne saqtandyrý qyzmeti, jyljymaıtyn múlik operatsııalary, óner, oıyn-saýyq jáne demalys, densaýlyq saqtaý jáne áleýmettik qyzmetter», - degen aqparat berdi statıstıka departamentindegiler.
Shaǵyn jáne orta bıznes salasynda 103 myńnan astam adam jumys isteıdi, bul oblystaǵy jumyspen qamtylǵan halyqtyń 35,4%-yn quraıdy.
