Soltústik Qazaqstandaǵy Býgrovoe kólinde móńke balyǵy qyryldy
PETROPAVL. QazAqparat – Soltústik Qazaqstan oblysyndaǵy Býgrovoe kólinde móńke balyǵy qyrylyp qaldy. Sebebin anyqtaý úshin mamandar oqıǵa ornynda jumys istep jatyr, dep habarlaıdy QazAqparat tilshisi.
Mamandardyń paıymdaýynsha, balyqtardyń qyrylýyna 2 faktor áser etýi múmkin.
«Sonyń biri – kóldiń qatýynan balyqtarǵa aýa jetpegen. Ekinshi sebebi – sý quramyndaǵy tuz mólsheriniń shamadan tys artýy. Qazir kól basynda tıisti memlekettik organdardyń qyzmetkerleri jumys istep jatyr. Komıssııa sýdyń synamasyn jáne balyqtyń ushasyn alyp zertteıdi», - deıdi SQO Tabıǵı resýrstar jáne tabıǵatty paıdalanýdy retteý basqarmasynyń qyzmetkerleri.
Aıta keteıik, Qyzyljar aýdanynda ornalasqan Býgrovoe kóliniń aýmaǵy - 69 ga. Sý qoımasynyń tereńdigi - shamamen 1,5 metr. Negizinen móńke balyǵy mekendeıdi. Eldi meken mańynda ornalasqanymen, kól jalǵa berilmegen, rezervte tur.
Eske salsaq, Shyǵys Qazaqstanda toǵan balyǵy jappaı qyrylǵan edi.
