Soltústik Qazaqstanda zyǵyr maıy óndiriledi
PETROPAVL. QazAqparat - Soltústik Qazaqstan oblysy Jambyl aýdany Blagoveşenka aýylynda «Dınastııa Agro» kompanııasy zyǵyr maıyn shyǵarady, dep habarlaıdy «QazAqparat» HAA tilshisi.
Maıly daqyldar óńdeıtin tseh ótken jyldyń jeltoqsan aıynda iske qosyldy. Ony kompanııanyń negizin salýshy Vladımır Kannyń uly Ilıa basqarady. Kásiporynǵa SQO ákimi Qumar Aqsaqalov bardy. 
«Kásiporynǵa jabdyqtardy jaqynda ǵana ornattyq. Taıaýda ekinshi jeli iske qosylady, keıin táýligine kem degende 20 tonna maı óndiretin bolamyz. Maı shıkizaty boıynsha óndiris kólemin 6-7 myń tonnaǵa jetkizemiz. Qytaılyq taraptan suranys óte joǵary. Bizge kelgen alǵashqy kompanııa 5 myń tonna maıǵa kelisimshart jasasýǵa daıyn boldy», - dedi Vladımır Kan.
Kásipkerdiń aıtýynsha, olar tórt kompanııamen kelissózder júrgizýde. Shıkizatpen eshqandaı problema joq. Ótken jyly aýdanda 26 myń gektar maıly daqyldar egildi, kompanııa ony óziniń egistiginde ósirýde. «Dınastııa Agro» JShS budan bólek tabıǵı zyǵyr tahnıkalyq maıyn óndiredi. Ol aǵashtyń betin óńdeýge arnalǵan, ekologııalyq jaǵynan taza ári densaýlyqqa zııan keltirmeıdi. 
Vladımır Kan oblys ákimimen kezdesý barysynda óndiristi keńeıtýdi josparlap júrgenin aıtty. Alaıda, aınalymdaǵy qarjy jetpeıtindikten, bıznes-jospar daıyndap, nesıe alýǵa ótinish bergen.
Qumar Aqsaqalov damyp kele jatqan kásiporyndy qoldaýǵa ýáde etti.
