Soltústik Qazaqstanda jazǵy demalyspen 67 myń oqýshy qamtylady
PETROPAVL. QazAqparat - Bıyl SQO-da oqýşylar 100% jazǵy demalyspen qamtylady. Bul - 67 myń oqýshy, dep habarlaıdy QazAqparat tilshisi.
Oqýshylardy jazǵy demalyspen qamtamasyz etý máselesi SQO ákimdiginiń otyrysynda talqylandy.
Óńir basshysy baspasóz qyzmetiniń habarlaýynsha, soltústikqazaqstandyq balalardy 14 demalys lageri qarsy alýǵa daıyn. Onyń beseýi senimgerlik basqarýda. Oblys ákimi Qumar Aqsaqalov demalys oryndaryn senimgerlik basqarýǵa berý úrdisin odan ári jalǵastyrý kerek deıdi.
«Bizde jaqsy mysal bar. Taıynsha aýdanynda jeke kásipker balalar lagerin senimgerlik basqarýǵa alyp, nysanda jaqsy jaǵdaı jasaý úshin 18 mln teńge jumsady. Oblys boıynsha 5 lager senimgerlik basqarýda. Onyń sanyn kóbeıtý kerek. Tájirıbe júzinde qolǵa alýǵa bolady. Bul qazir jaqsy bıznes. El boıynsha osyndaı úrdis bar. Kolledjderdi, emhanalar men mektepterdi senimgerlik basqarý júıesine ótkizýde. Bizge eń bastysy tarıf qoljetimdi bolý kerek», - dedi Qumar Aqsaqalov.
Lagerlerde demalý aqysy 15 myńnan 30 myń teńgege deıin. Bul basqa aımaqtarmen salystyrǵan edáýir arzan. Jergilikti kásipkerler demeýshilik jasap, 191 balaǵa 17 mln teńgege joldama alyp berdi. Demalys lagerlerinen bólek jazda túrli úıirmeler men aýlalyq klýbtar ashylyp, oǵan 10 myńǵa jýyq oqýshy tartylmaq.
«Lagerlerden bólek jalpy bilim beretin 480 mektepte mektep janyndaǵy alańdar jumys isteıdi. 95 palatkalyq lager qurylyp, onda «Jas sarbaz» áskerı-patrıottyq uıymynyń músheleri demalady. Odan bólek 24 aýlalyq klýb qurylmaq», - deıdi SQO Bilim berý basqarmasy basshysynyń orynbasary Tatıana Protopopova.
Mamandardyń aıtýynsha, bıyl balalar lagerlerinde 44 mln teńgege kúrdeli jumys istelindi.
