Soltústik Qazaqstanda jaı túsip, úsh adam ajal qushty
PETROPAVL. QazAqparat - Soltústik Qazaqstan oblysy Ýálıhanov aýdany Bıdaıyq aýylynda 12 jasar bala men eki eresek kisi naızaǵaı túsip qaıtys boldy, dep habarlaıdy «QazAqparat» HAA.
Oblystyq TJK málimeti boıynsha, qaıǵyly oqıǵa 16 maýsym kúni adamdar óristen qaıtqan malyn qaıyryp alý úshin aýyldyń shetinde turǵanda bolǵan. Bul kezde naızaǵaı oınap, jańbyr quıyp turǵan. Birinshi jaı balaǵa túsken. Onyń aýyldasy dereý dárigerdi, aýyl ákimi men ýcheskelik ınspektordy shaqyrǵan.
«Aýyl feldsheri men júrgizýshi oqıǵa ornyn qarap jatqanda ekinshi ret naızaǵaı túsken. Bul joly kómek shaqyrǵan 34 jastaǵy er adam men 39 jastaǵy feldsherlik-akýsherlik pýnkttiń júrgizýshisi ajal qushqan. Olardyń denelerine medıtsınalyq ekspertıza jasalady», - delingen habarlamada.
