Soltústik Qazaqstanda jasyryn satyp alýshylar memlekettik organdardy tekserdi
Departament baspasóz qyzmetiniń aqparaty boıynsha, tekserý kezinde «jasyryn satyp alýshy» ádisi qoldanylady. Onyń kómegimen zańnamany jáne usynymdardy oryndaýdyń jasyryn buzýshylyǵy anyqtalady.
Bul joly «jasyryn satyp alýshylar» Esil jáne Ýálıhanov aýdandaryndaǵy memlekettik organdarǵa bardy.
«Esil aýdanynyń jumyspen qamtý jáne áleýmettik baǵdarlamalar, jer qatynastary bólimderinde kútý oryndarynda oryndyqtar qoıylǵan, biraq oǵan otyrý múmkin emes. Sebebi, oryndyqtardyń otyratyn jáne shyntaq tireıtin jeri joq», - dep atap ótti baspasóz qyzmetinen.
Tekserýshi terezeniń aldynan shelek pen aspaly sham tapqan.
Qoǵamdyq uıym ókiliniń aıtýynsha, memlekettik organ ornalasqan ǵımarattyń ishi qarańǵy, lınoleýmderi jyrtylyp ketken. Byltyrdan beri eshteńe ózgermegen, tek baspaldaqtar ǵana retke keltirilgen.
«Soltústik Qazaqstan boıynsha memlekettik korporatsııanyń Esil aýdanyndaǵy bólimshe ǵımaratynda sanıtarlyq torap joq. Dárethana ǵımarattan qashyq jerde dalada ornalasqan jáne qulyptaýly tur», - dedi baspasóz qyzmetinen.
Ýálıhanov aýdanynda sáýlet, qurylys, TKSh, jolaýshylar kóligi jáne avtomobıl joldary bóliminde múmkindigi shekteýli jandar úshin jaǵdaı jasalmaǵan.
Sondaı-aq, jasyryn satyp alýshy Esil aýdandyq ákimdiginiń bilim bólimi ǵımaratyndaǵy minsiz pandýsqa, qolaılylyq pen tazalyqqa nazar aýdarǵan.
«Memlekettik organ basshylary Esil aýdandyq bilim bóliminen úlgi alý kerek shyǵar. Bárin ózgertýge bolady, tek basshylyq qalasa bolǵany», - dep atap ótti qoǵamdyq uıym ókili.
