Soltústik Qazaqstanda jaryq pen jylý arzandady

PETROPAVL. QazAqparat - Soltústik Qazaqstan oblysynda 1 qarashadan bastap jaryq pen jylý arzandaı tústi, dep habarlaıdy QazAqparat tilshisi.

Soltústik Qazaqstan oblystyq tabıǵı monopolııalardy retteý, básekelestikti jáne tutynýshylar quqyǵyn qorǵaý departamenti basshysynyń orynbasary Natalıa Shaıahmetovanyń aıtýynsha, Bas prokýratýranyń monopolıster qyzmetin tekserýi tarıfterdiń tómendeýine áser etken.

«Bas prokýratýra oblystyq prokýratýra qyzmetkerlerimen birge kásiporyndarǵa tekserý júrgizdi. Sonyń nátıjesinde qyzmetter tarıfteriniń baǵasy tómendedi», - dedi N.Shaıahmetova.

Budan bylaı, 1 kılovatt-saǵat elektr energııasynyń quny jeke tulǵalar úshin 11,8 teńge bolady. Buǵan deıin óńir turǵyndary ár kılovatqa 13 teńge 22 tıynnan, al zańdy tulǵalar 16,32 teńgeden tólep kelgen. Endi 14,57 teńgeden bolady. Al qosylǵan qun salyǵy tarıftiń qunyna kirmeıdi.

Satý tarıfine qaraı, tutyný kólemi boıynsha elektr energııasynyń saralanǵan tarıfi de esepteldi. Elektr plıtalaryn qoldanatyn jeke tulǵalar tutyný kólemine baılanysty árbir kılovatt-saǵat úshin 9,55 teńgeden 17,7 teńgege deıin, al elektr plıtalaryn qoldanbaıtyndar úshin 10,5-17,7 teńge aınalasynda belgilendi.

Turǵyndar úshin jylý energııasynyń tarıfteri qosylǵan qun salyǵyn qospaǵanda, 1 gıgakallorııa úshin 3185,84 teńgeden 3150,37 teńgege deıin tómendedi. Endi jylýdy esepteıtin prıbor ornatpaǵan úıler 1 gıgakallorııa jylý úshin 3823 teńgeniń ornyna 3780,44 teńge, al esepteýishi bar úıler 3034,30 teńge tóleıdi.