Soltústik Qazaqstanda jaǵdaı turaqty - TJK

NUR-SULTAN. QazAqparat - QR ІІM Tótenshe jaǵdaılar komıteti sý tasqyny boıynsha Soltústik Qazaqstanda jaǵdaıdyń qandaı ekenin jarııa etti, dep habarlaıdy QazAqparat tilshisi.

«Soltústik Qazaqstan boıynsha: Sergeev sý qoımasy arqyly sýdyń jıekten asyp aǵýy 127 santımetrdi qurap, bir táýlikte 21 santımetrge kóterildi. Dese de, Soltústik Qazaqstannan kelip jatqan baıandamalarǵa sáıkes, jergilikti shaǵyn ózenderde sý azaıa bastaǵan. Al Atbasardan jáne Kolýtonnan sý Sergeev sý qoımasyna deıin 10 kúnde jetedi», - dedi TJK bastyǵy Vladımır Bekker vedomstvoda ótken brıfıngte.

Onyń aıtýyna qaraǵanda, atalmysh óńirde sý basý qaýpinen úreılenetindeı sebep joq.

«Sergeev sý qoımasynan sý deńgeıi eń sońǵy ret 2017 jyly qatty kóterilip, 3,32 santımetrge jetken edi. Bıylǵy sý deńgeıi odan birshama tómen. Mine, sol sebepti ol jaqta jaǵdaı aıtarlyqtaı turaqty», - deıdi Vladımır Bekker.

Eske sala ketsek, shamamen osydan bir apta buryn SQO-nyń Ýálıhanov aýdanyndaǵy sý basý qaýpi bar Qaratal aýylynyń turǵyndary qaýipsiz jerge kóshirilgen bolatyn. Qaratal aýylynyń turǵyndary evakýatsııalyq beket - Qýlykól aýylyndaǵy mektepke ýaqytsha ornalastyrylǵan edi.

Aıta ketsek, búgingi ótken baspasóz máslıhatynda QR Іshki ister mınıstrligi Tótenshe jaǵdaılar komıtetiniń tóraǵasy Vladımır Bekker Aqmola oblysyndaǵy tasqyn jaǵdaıy qandaı qaýip týdyryp turǵanyn aıtyp bergen bolatyn.

Onyń sózine qaraǵanda, Atbasardaǵy bóget asa aýqymdy mólsherdegi sýdy ustap tur.