Soltústik Qazaqstanda zańsyz elik atqan brakoner sottaldy
PETROPAVL. QazAqparat – Soltústik Qazaqstan oblysynda zańsyz elik atyp, memleketke 1 mln artyq teńge shyǵyn keltirgen aýyl turǵynyna qatysty sot úkimi shyqty, dep habarlaıdy QazAqparat tilshisi.
SQO soty baspasóz qyzmetiniń málimetinshe, 29 qarasha kúni Tımırıazev aýylynyń turǵyny ań aýlaýǵa shyqqan. Onyń sibir eligin atýǵa ruqsat beretin joldamasy bolmaǵan.
Al ózimen birge alyp shyqqan qosaýyz myltyǵyn zańdy túrde tirkemegen.
Rassvet eldimekenine qaraı baǵyt alǵan ol alqapta jaıylyp júrgen tórt sibir eligin kóredi. Kóp oılanbastan myltyǵyn alyp, jabaıy ańnyń bireýin atyp alady.
Osylaısha sottalýshy memleketke 1 041 750 teńge shyǵyn ákelgen.
Tımırıazev aýdandyq soty qylmystyq isti qarady. Sot barysynda sottalýshy óz kinásin tolyq moıyndady.
Sot zańsyz elik atqan aýyl turǵynynyń 1,5 jylǵa bas bostandyǵyn shektedi.
Sondaı-aq ol 3 jylǵa ań aýlaý quqyǵynan aıyryldy.
Úkim ázirge zańdy kúshine engen joq.
