Soltústik Qazaqstanda volonterler 12 adamdy izdep tabýǵa kómektesti

PETROPAVL. QazAqparat – Soltústik Qazaqstan oblysynda volonterler polıtseılermen birge 900-den astam quqyq buzýshylyqty anyqtap, 12 adamdy izdep tabýǵa kómektesti, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, polıtsııa qyzmetinde volonterlerdiń eńbegi orasan.

Olar ýchaskelik ınspektorlardyń oń qolyna aınalǵan. Eriktiler monıtor aldyna otyryp, beınebaqylaý júrgizedi.

Osyndaı jumystyń nátıjesinde bıyl 900 astam quqyq buzýshylyq anyqtalǵan.

Volonterler iz-túzsiz joǵalǵandardy izdeýde de taptyrmas kómekshi. Bıyl olar tártip saqshylarymen birge osyndaı 70 operatsııaǵa qatysty.

Polıtseılermen ıyq tirese joǵalǵandardy orman massıvterinen, saıajaı ýchaskelerinen, jertóleler men qaraýsyz qalǵan úılerden jáne júrýi múmkin basqa da jerlerden izdedi.

Eriktiler áleýmettik jelilerde baǵdarlardy taratyp, tanymal pablık ákimgerlerimen jaqsy baılanys ornatqan. Osylaısha bıyl 12 adamdy izdep tabýǵa kómektesti.

Belsendi jastar polıtseılermen profılaktıkalyq jumystardy da atqarady.

Qylmystyń aldyn alýǵa baǵyttalǵan túrli jadynamalardy taratyp, 400-den astam esirtki graffıtıin boıady.

«Volonterlermen ózara qarym-qatynas tek bıyl ǵana qolǵa alynǵan joq. Jaqsy tájirıbemiz bar. Búginde jastar ınternettiń múmkindikterin jaqsy meńgergen. Olar óz kúshterimen izdestirý is-sharalary, aktsııalar boıynsha, esirtkige qarsy taqyrypta beınerolıkter ázirlep, áleýmettik jeliler arqyly taratady. Keıde birlesken jumystyń jańa baǵyttaryn ózderi de usynyp jatady. Biz aldaǵy ýaqytta da atalǵan qoǵamdyq rezervti barynsha paıdalanamyz», - deıdi SQO PD bastyǵy Marat Tólebaev.