Soltústik Qazaqstanda turǵyn úılerdi taǵy da sý basty
PETROPAVL. QazAqparat - Aıyrtaý aýdanynda turǵyn úılerdiń sý astynda qalýy taǵy da tirkeldi, dep habarlaıdy «QazAqparat» HAA tilshisi SQO TJD baspasóz qyzmetine silteme jasap.
«Konstantınovka aýylynda tańerteń Babyq-Búrlik ózenindegi sý deńgeıiniń kóterilýine baılanysty 12 jeke úı sý astynda qalyp, sonyń ishinde 10 úıdegi tasyǵan sýdyń deńgeıi edennen 8-10 sm-ge joǵary bolǵan. 27 adam evakýatsııalanyp, úsheýi evakýatsııalyq beketke, 24-i týystaryna ornalastyryldy. Sonymen qatar 30 iri qara mal basy qutqaryldy.
«17 sáýir kúni 18.00-degi jaǵdaı boıynsha sýdyń deńgeıi tómendep, úılerden sý ketti. Jerqoımalar arqyly sýlardy aıdaý josparlanýda», - dedi baspasóz qyzmetinde.
Gýsakovka aýylynda 26 jeke úıdi sý basyp, 14 úıdegi sý deńgeıi edennen 20-50 sm-ge joǵary bolǵan. Taǵy 12 úıge sý basý qaýpi tóngen. 27 adam qutqarylyp, 22 bas iri qara mal evakýatsııalandy. Qazir sý deńgeıi báseńsip, úılerdegi sýlar ketti.
Ǵ.Muratbaev atyndaǵy aýdannyń Rýzaevka aýylynda sý deńgeıi tómendedi. Qutqarýshylardyń aqparaty boıynsha, 175 úıdegi sýlar ketip, 10 úı sý astynda qaldy. Onyń úsheýinde kisi turmaıdy. Jerqoımalar arqyly sýlardy aıdaý josparlanýda.
Aqan-Búrlik ózenindegi sý deńgeıiniń kóterilýine baılanysty Chıstopole aýylynda 19 turǵyn úıdi sý basyp, 54 adam evakýatsııalandy. Sýdyń deńgeıi áli ózgerissiz tur.
SQO TJD baspasóz qyzmeti atap ótkendeı, 16-17 sáýir kúnderi Ǵ.Muratbaev atyndaǵy jáne Aıyrtaý aýdandaryndaǵy 6 eldi mekenniń 259 turǵyn úıi tasqyn sýdyń astynda qaldy. Evakýatsııalyq is-sharalar júrgizildi, eshkim zardap shekken joq.
