Soltústik Qazaqstanda turǵyn úı qurylysy qymbattady
PETROPAVL. QazAqparat - Soltústik Qazaqstan oblysynda birinshi jartyjyldyqtaǵy áleýmettik-ekonomıkalyq damý kórsetkishteriniń nátıjesi shyǵaryldy, dep habarlaıdy «QazAqparat» HAA tilshisi statıstıka departamentine silteme jasap.
Jyl basynan beri oblysqa 66 mlrd ınvestıtsııa tartyldy. Óndiristik kásiporyndar 103,3 mlrd teńgeniń ónimderin shyǵardy. Negizgi úles óńdeýshi ónerkásipterdiń enshisinde. Bıylǵy jyly irimshik, súzbe, et, makaron jáne un óndirisi artty.
«Mashına jasaý óndirisiniń kólemi 2,4 esege, jeńil ónerkásip - 1,9 ese, mashınalar men qurylǵylardan basqa daıyn metal ónimderi - 1,6 esege artty. Qurylys maqsatyndaǵy beton ónimderi men as úı jıhazdarynyń árqaısysynyń shyǵarylymy - 1,6 esege kóbeıdi», - dep málim etti departament.
Soltústikqazaqstandyq statıstıka málimetteri boıynsha, byltyrǵy jylmen salystyrǵanda turǵyn úılerdiń berilýi 40%-ǵa artty. Jarty jyl ishinde 54 myń «kvadrattan» joǵary turǵyn úı paıdalanýǵa berildi. Sonymen qatar, qurylystyń ortasha quny da artyp, 1 sharshy metr - 80,9 myń teńgeni qurady. 2016 jyldyń qańtar-shilde aılarynda bul kórsetkish 54,1 myń teńgeni quraǵan.
Birinshi jartyjyldyqta 223 jańa ǵımarattyń qurylysy aıaqtaldy, olardyń 206-sy turǵyn úı, 17-si turǵyn úıge jatpaıtyn jaılar. Maýsym aıynda un-jarma ónimderin óndirý óndiristeri, saýda pavılondary, oıyn-saýyq ortalyqtary, keńseler, avtokólikterge tehnıkalyq qyzmet kórsetý jáne jóndeý stantsııalary, sulýlyq salondary men shashtarazdar, shaǵyn marketter paıdalanýǵa berildi.
