Soltústik Qazaqstanda týberkýlezben aýyratyn balalar sany kóbeıgen
PETROPAVL. QazAqparat - Soltústik Qazaqstan oblysyndaǵy epıdemıologııalyq jaǵdaı týraly qoǵamdyq densaýlyq saqtaý departamentiniń basshysy Serikbaı Qasmaqasov aıtty, dep habarlaıdy «QazAqparat» HAA tilshisi.
Onyń aqparaty boıynsha, byltyr esepte turǵan 99 túrli juqpaly jáne parazıttik aýrýdyń 22 túri boıynsha naýqastanǵandar bolmaǵan. Týlıaremııa, lısterıoz, menıngokokktyq ınfektsııanyń jekelegen jaǵdaılary tirkelgen. Salmonellez, ótkir ishek ınfektsııalary, dermatomıkoz jáne ehınokokkoz dertterin juqtyrý aıtarlyqtaı tómendegen.
«Sonymen qatar, halyq arasynda pedıkýlezben syrqattaný 2,3 ese ulǵaıýy (246 jaǵdaı) baıqaldy, AIV-ınfektsııasy 1,7 esege ósip, 280 adam bul dertke dýshar bolǵan. «A» vırýstyq gepatıtin juqtyrý jaǵdaıy 14 ret bolsa, 2016 jyly bir de bir tirkelmegen. Gelmıntoz jáne opıstorhozben aýyrǵandar sany artqan», - dedi S.Qasmaqasov.
Týberkýlez boıynsha epıdemıologııalyq jaǵdaı 8,2%-ǵa azaısa da, ahýal ýshyǵyp tur. Óńirde naýqastyq kórsetkishi respýblıkalyq ortasha deńgeıden asyp otyr. Byltyr 18 jasqa deıingi 22 bala juqtyrǵan. Bul byltyrǵy kórsetkishten 37%-ǵa joǵary.
2017 jyly tumaýǵa qarsy ekpege 52 mıllıon teńge bólingen. Bul 60 myń adamǵa ekpe egýge múmkindik bergen.
Serikbaı Qasmaqasov jalpy óńirdegi epıdemıologııalyq jaǵdaıdy jaqsy dep sıpattady.
