Soltústik Qazaqstanda tasjoldarda 280 jylytý beketi ashyldy
PETROPAVL. QazAqparat - Soltústik Qazaqstan oblysynda birneshe kún boıy aıazdy aýa raıy saqtalady, dep habarlaıdy «QazAqparat» HAA tilshisi.
Óńir turǵyndary úsh kún boıy qatarynan 122 qyzmetinen aıaz týraly habarlama alýda. Mektepterde sabaqtar toqtatylyp, joldar jabyq tur.
SQO TJD bastyǵy Ramıl Kamalovtyń aqparaty boıynsha, respýblıkalyq jáne oblystyq mańyzy bar tasjoldarda 280 jylytý beketi qurylǵan.
Іzdeý-qutqarý jumystaryn júzege asyrý úshin 14 top uıymdastyrylǵan. Qar tazalaıtyn 700 tehnıka daıyndalyp, 25 tonna benzın men 65 tonna dızeldik otyn qory, 180 tonna tuz ben 1,7 myń tonna topyraq ázirlengen.
«Aýa raıyna baılanysty qystyń birinshi jartysynda tótenshe jaǵdaı bolmaǵan edi. 11 qańtarda aýa raıynyń qolaısyzdyǵyna baılanysty oblystaǵy birqatar aýdandardaǵy respýblıkalyq jáne oblystyq mańyzy bar tasjoldarda jol qozǵalysyna shekteý qoıyldy. Qazir aýa temperatýrasynyń tómendeýi saldarynan oblystyq mańyzy bar barlyq tasjoldarda dızeldik kólikterdiń jolǵa shyǵýyna tyıym salyndy», - dep atap ótti R. Kamalov.
Ótken qysta SQO-daǵy tasjoldarda 37 ret jol qozǵalysyna shekteý qoıylyp, 26 ret eskertý jarııalanǵan.
