Soltústik Qazaqstanda tasqyn astynda qalǵan aýyldardaǵy sý deńgeıi tómendeýde
PETROPAVL. QazAqparat - Ǵ.Músirepov atyndaǵy aýdanǵa qarasty sý astynda qalǵan aýyldardaǵy sýdyń deńgeıi tómendedi, dep habarlaıdy «QazAqparat» HAA tilshisi SQO TJD baspasóz qyzmetine silteme jasap.
«17 sáýir kúni keshkisin sýdyń deńgeıi anaǵurlym tómendep, adamdar óz úılerine orala bastady. 4 úı ázirge sý astynda qalyp tur - bireýi Rýzaevka aýylynda jáne úsheýi Ǵ.Músirepov atyndaǵy aýdannyń Chıstopole aýylynda ornalasqan», - dep habarlady baspasóz qyzmeti.
Eske salaıyq, 16 sáýir kúni Jembaraq ózeniniń tasýy saldarynan sý deńgeıi kenet kóterilip ketti. Rýzaevka aýylynda 83 turǵyn úı men 185 aýlany tasqyn sý basyp qaldy. Dál osyndaı jaǵdaı Chıstopole aýylynda oryn alyp, Aqan-Búrlik ózenindegi sý deńgeıiniń kóterilýine baılanysty 19 turǵyn úıdi sý basyp, 54 adam evakýatsııalandy. Raısovka aýylynda Sharyq ózeniniń arnasynan asýyna baılanysty 30 turǵyn úı zardap shekti. Aqan-Búrlik ózeniniń tasýy saldarynan Quıǵan aýylynda turatyn 1 otbasy zardap shekti.
Kelesi kúni Aıyrtaý aýdany Konstantınovka aýylyndaǵy turǵyn úıler sý astynda qaldy. Dál osy aýdandaǵy Babyq-Búrlik ózeni arnasynan asyp, Gýsakovka aýylyndaǵy 26 jeke úıdi sý basty jáne 12 úıge qaýip tóndi.
780 adam, sonyń ishinde 110 bala evakýatsııalandy. Olar týystary men evakýatsııalyq beketterge ornalastyryldy. Sondaı-aq, 1929 úı janýarlary qutqaryldy. Aldyn ala derek boıynsha, Rýzaevka aýylyndaǵy 92 bas iri qara mal qyrylyp qaldy. Bul jaǵdaı tekserilýde.
