Soltústik Qazaqstanda sý tasqynynyń ekinshi tolqyny júrýi múmkin
PETROPAVL. QazAqparat – Soltústik Qazaqstan oblysyna qutqarýshylardyń boljamynsha sý tasqynynyń ekinshi tolqyny kele jatyr, alaıda ol birinshisine qaraǵanda áldeqaıda álsiz bolmaq, dep habarlaıdy QazAqparat tilshisi.
SQO Tótenshe jaǵdaılar departamentiniń azamattyq qorǵaý salasyndaǵy apattar táýekelin tómendetý jáne baqylaý basqarmasy bastyǵynyń mindetin atqarýshy Serik Naýryzbaev brıfıngte kóktemgi sý tasqyny boıynsha aqparattandyrdy. Onyń aıtýynsha, qazir óńirde jaǵdaı turaqtaldy.
«Sergeev sý qoımasynda sý bógetten 85 sm asyp, tógilip jatyr. Qazgıdromettiń Toqsan bı aýylynyń mańynda ornalasqan gıdrologııalyq bekettiń málimetinshe, sý deńgeıi túsip jatyr. ıAǵnı sý Sergeev sý qoımasyna jetti. Alaıda, bizdiń boljam boıynsha Esil ózeninde sý deńgeıi ekinshi ret qatty kóterilmeıdi, biz ony baıqamaımyz da», - dedi Serik Naýryzbaev.
Ótken aptada qutqarýshylar Petropavl sý qoımasynda jáne Teplıchnoe eldi mekeni janynda Esil ózeni deńgeıiniń kóterilgenin baqylady.
«Teplıchnoe eldi mekeninde qatty jeldiń saldarynan qıyn jaǵdaı týyndady. Qatty tolqyn jasaǵan bógetimizdi shaıyp kete jazdady. Qum toly qaptarmen bekittik. Dál sondaı jaǵdaı Zarechnyı kentinde de boldy. Petropavl sý qoımasynda 24-26 sáýir aralyǵynda sý deńgeıi óz sharyqtaý shegine jetti. Qazir táýligine 3-4 sm túsip jatyr. Sý aǵyspen tómen ketti. Qazir Sokolovka eldi mekeniniń mańynda sý deńgeıi kóterilgen», - dedi S.Naýryzbaev.
