Soltústik Qazaqstanda sý tasqynynyń aldyn alýǵa 7,8 mlrd teńge bólindi
PETROPAVL. QazAqparat - SQO ákimi Qumar Aqsaqalovtyń tóraǵalyǵymen oblystyq ákimdiktiń otyrysy ótti, dep habarlaıdy óńir basshysynyń resmı saıty .
Otyrysta jalpyǵa tegin tehnıkalyq bilim jobasyn iske asyrý barysy talqylandy. Joba aıasynda qyzmet kórsetý, tehnıkalyq, tehnologııalyq jáne aýyl sharýashylyǵy mamandyqtary boıynsha 2025 adam jumysqa alyndy. Nátıjeli eńbek jáne jappaı kásipkerlik baǵdarlamasy aıasynda 6 aýyl kolledji 426 stýdentti qabyldady. Bıyl oblys kolledjderin 3677 túlek bitirip shyqty. Jumysqa 2662-sy ornalasty nemese 73 paıyz. Óńir basshysy jastardy jumysqa ornalastyrý máselesin jiti baqylap otyrý kerektigin eskertti. Sondaı-aq, kásipti aýystyrý boıynsha jol kartasyn daıyndaýdy tapsyrdy.
Otyrysta qarttardy qoldaý aılyǵy qorytyndylandy. Onyń aıasynda qaıyrymdylyq senbiligine 149 myńnan asa adam qatysyp, 80 mln teńge aqsha jınaldy. Búkil qarjy qarttar men múgedekterge kómek kórsetýge baǵyttaldy. Jalpy, aılyq aıasynda 79486 adamǵa 145 mln teńge kóleminde materıaldyq kómek kórsetildi.
Kásiporyndarmen baılanysty úzgen zeınetkerlerdi anyqtaý jumysy da júrgizildi. 35 myńnan asa qarııanyń 9 myńy kásiporyndarǵa tirkelgen nemese 27 paıyzy. Petropavl boıynsha bul kórsetkish tek 1,8 paıyzdy quraıdy. Óńir basshysy qala ákimine jaǵdaıdy durystap, barlyq zeınetkerlerdi kásiporyndarǵa tirkeýge tapsyrma berdi.
Otyrysta kóktemgi sý tasqynyn aldyn alý máseleleri de talqyǵa salyndy. Bıyl oblysta bul baǵytqa 3,4 mlrd teńge baǵyttaldy. Kelesi jyly 1,7 mlrd, 2019 jyly 2,7 mlrd teńge bólinedi. Úkimetten bıyl 3,1 mlrd teńge Bylǵary zaýyty kentinde damba salýǵa jáne avtomobıl joldaryn jóndeýge jumsaldy. Qazir qurylys jáne jóndeý jumystary aıaqtalýǵa jaqyn. Oblys ákimi tasqynǵa qarsy jumystarǵa bólingen qarjynyń jetkilikti ekenin, barlyq jumystardy ýaqtyly aıaqtaýdy tapsyrdy.
