Soltústik Qazaqstanda sý tasqyny saldarynan respýblıkalyq jol jabyldy
PETROPAVL. QazAqparat - Ótken demalys kúnderi Petropavl qalasy Zarechnyı kentine kireberis jerdegi respýblıkalyq mańyzy bar «Chelıabi-Novosibir» avtojolyn 2 ret tasqyn sý shaıyp ketti, dep habarlaıdy «QazAqparat» HAA tilshisi SQO TJD baspasóz qyzmetine silteme jasap.
Birinshi ret basqan tasqyn sýdyń uzyndyǵy 200 metrdi, tereńdigi - 90 santımetrdi quraıdy. Ekinshisinde uzyndyǵy - 400 metr, tereńdigi - 60 santımetrge jetken. Avtokólikterdiń qozǵalysyna tyıym salynyp, eskertý belgileri qoıyldy. Jergilikti polıtsııa qyzmetkerleri táýlik boıy kezekshilik etip jatyr. Zarechnyı kentiniń jergilikti mańyzy bar tasjoldy da sý basty, onyń uzyndyǵy 200 metrdi, tereńdigi 50 santımetrdi quraıdy.
Qyzyljar aýdany Prıbrejnoe aýylyna jaqyn jerdegi jergilikti mańyzy bar avtojoldy túnde uzyndyǵy 500 metrdi jáne tereńdigi 40 santımerge jetetin tasqyn sý shaıyp ketti. Joldyń barlyq bóligi jabylyp, polıtseıler men arnaıy tehnıka kúzetip jatyr.
«Petropavl qalasynda, Hromzavod kentinde jergilikti atqarýshy organdardyń kómegimen bıiktigi 1,5 metr, uzyndyǵy 50 metr bolatyn bógetti qalpyna keltirý jumystary júrgizilýde. Ótken táýlikte oblys boıynsha sý basqan úıler tirkelmedi. Qyzyljar aýdany Bogolıýbovo aýylynda halyqty jáne úı maldaryn aldyn ala evakýatsııalady. Bul jerde 7 aýlany sý basty. Nadejka aýylynda bir aýla sý astynda qaldy. Vıshnevka jáne Bıshkól aýyldarynda tórt túlik mal qaýipsiz jerge aıdaldy. Zarechnyı kentinde de turǵyndar aldyn ala evakýatsııalanyp, úı janýarlary qaýipsiz jerge aıdaldy», - dedi baspasóz qyzmetinde.
Qazir Esil ózenindegi sý deńgeıiniń kóterilýi baqylaýǵa alynyp, baqylaý beketteri qoıyldy.
