Soltústik Qazaqstanda sý tasqyny ahýaly turaqtandy
PETROPAVL. QazAqparat - Soltústik Qazaqstan oblysyna kelgen Almaty, Astana men Pavlodar qalalarynyń qutqarýshylary qaıtyp jatyr, dep habarlaıdy «QazAqparat» HAA tilshisi.
Apattyq-qutqarý jumystaryn júrgizý jáne sý tasqyny kezinde halyqqa kómek kórsetý úshin óńirge kelgen QR ІІM TJK qutqarý bólimi búgin ózderiniń turaqty ornalasqan jerlerine qaıtty.
Oblysta jeke quramnyń 69 adamy jumys istedi, qosymsha 11 tehnıka men 8 qaıyq jetkizildi. Respýblıkalyq bólimderdiń qutqarýshylary Petropavl qalasynyń Teri zaýyty jáne Zarechnyı kentterine, SQO Qyzyljar aýdany Teplıchnoe, Prıbrejnoe, Dolmatovo jáne Bolshaıa Malyshka aýyldaryndaǵy qorǵanys bógetterin bekitýge, halyqty evakýatsııalaýǵa atsalysty.
Oblys, qala jáne Qyzyljar aýdany ákimderiniń atynan birqatar qutqarýshylarǵa alǵys hattar tabystaldy.
«SQO-ǵa 27 qutqarýshymen birge 24 sáýir kúni keldik. Birneshe topqa bólinip, túrli nysandarda jumys istedik. Bizdiń top Zarechnyı kentinde jumys jasady. Alǵashqy birneshe táýlikte múldem uıyqtamadyq. Adamdardy, maldardy evakýatsııalap, qaýipsiz jerlerge kóshirdik. Bógetterdi bekitip, sýlardy aıdadyq. Onyń deńgeıine monıtorıng jasap, medıtsınalyq kómek kórsettik. Keıbir adamdar jaraqat alyp, shatyrlardan qulady», - dedi Almaty qalalyq respýblıkalyq jedel-qutqarý bóliminiń basshysy Vadım Pak.
Óńirdegi sý tasqyny ahýaly turaqtandy. Sý aqyryn ketip jatyr.
Sý tasqyny kezinde oblys boıynsha barlyǵy 380 úı zardap shekti. Tasqyn sý tolyǵymen ketkennen keıin zalaldy baǵalaý komıssııasy jumysqa kirisedi. 
