Soltústik Qazaqstanda sot aýdan ákimin jazalap, aıyppul saldy

PETROPAVL. QazAqparat – Soltústik Qazaqstan oblysy mamandandyrylǵan aýdanaralyq ákimshilik soty Qyzyljar aýdanynyń ákimine jáne osy aýdannyń jer qatynastary bólimi basshysynyń mindetin atqarýshyǵa aqshalaı óndirip alý jazasyn qoldandy, dep habarlaıdy QazAqparat tilshisi.

SQO soty baspasóz qyzmetiniń málimetinshe, oblystyq mamandandyrylǵan aýdanaralyq ákimshilik sotynda jaýapkershiligi shekteýli seriktestiktiń jer komıssııasynyń is-áreketin joqqa shyǵarý týraly ákimshilik is qaraldy.

Aldyn ala tyńdaýda aýdan ákimine jáne memlekettik organ basshysynyń mindetin ýaqytsha atqarýshy tulǵaǵa aqshalaı óndirip alý jazasy qoldanyldy.

«Aqshalaı óndirip alýdy qoldanýǵa sotqa talap boıynsha jazbasha qarsylyqtyń jáne ýaqytsha óteýli jerdi paıdalanýǵa quqyq berý boıynsha konkýrstyń materıaldaryn usynbaý negiz boldy.

Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly zańyna sáıkes ákim ákimshilik-aýmaqtyq bólinis sheginde basshylyq jáne baqylaý júrgizetin laýazymdy tulǵa ekendigin eskerdi.

Memlekettik organ basshysynyń mindetin ýaqytsha atqarýshy tulǵa memlekettik organǵa júktelgen mindetterdi tikeleı oryndaýshy retinde jaýap berdi», - delingen baspasóz habarlamasynda.

2021 jyldyń 28 shildedegi sot uıǵarymymen laýazymdy tulǵalardyń árqaısysy 10 AEK mólsherinde, ıaǵnı 29 170 teńge tóleýge tıis.