Soltústik Qazaqstanda shoshqa kesheninde iri órt boldy
PETROPAVL. QazAqparat - Taıynsha aýdany Novoıvanovka aýylynda shoshqa kesheni janyp ketti, dep habarlady «QazAqparat» HAA tilshisi SQO TJD baspasóz qyzmetine silteme jasap.
SQO Tótenshe jaǵdaılar departamenti Órt qaýipsizdigi salasyndaǵy baqylaý jáne profılaktıkalyq qyzmet basqarmasy basshysynyń orynbasary Igor Baleevtiń aqparaty boıynsha, TJ ornynda órt sóndirýshiler jalyn qushqan ǵımarattyń aınalasynan qatty tútindi baıqaǵan. Órt týraly aqparattyń kesh túsýi saldarynan tilsiz jaý úlken aýmaqty sharpyp úlgergen. Qutqarýshylar kelgenge deıin 3,6 myń tekshe metr janyp ketken.
«Órttiń saldarynan aldyn ala boljam boıynsha, azyq-túliktiń janýy men joǵary temperatýra saldarynan 28 bas shoshqa men 95 bas toraı ólip qalǵan. Ǵımarattyń shatyry opyrylǵan. Sendvıch-panelderden jasalǵan ǵımarattyń qurylymy zaqymdanǵan», - dedi Igor Baleev.
Aldyn ala málimetterge qaraǵanda, órt ǵımarattyń ishindegi elektr şıtindegi qysqa tuıyqtalý saldarynan shyqqan. Zalaldyń somasy anyqtalýda.
Órtti joıýǵa 30 adam, 9 avtotehnıka jumyldyryldy. «Merıan» JShS shoshqa kesheni 100 myń basqa arnalǵan, 2007 jyldyń qarasha aıynda paıdalanýǵa berilgen. Órt №1 ǵımarattan shyqqan. 
