Soltústik Qazaqstanda shilde-tamyz aılary jaýyn-shashyndy bolady
PETROPAVL. QazAqparat – Soltústik Qazaqstan oblysynda shilde-tamyz aılarynda aýa temperatýrasy ádettegi normaǵa saı bolsa, sınoptıkterdiń boljamynsha jaýyn-shashyn mólsherden artyq jaýmaq, dep habarlaıdy QazAqparat tilshisi.
«Qazgıdromet» RMK SQO boıynsha fılıaly jaz aılaryna aýa raıynyń boljamyn jarııalady.
Sınoptıkterdiń málimetinshe, maýsym aıynyń sońynda óńirde aýa temperatýrasy túnde +5+10 ° S, keı jerlerde +13+20 ° S-qa deıin, kúndiz +15+20 ° S-tan, keı jerlerde +23+33 ° S-ke deıin kóteriledi.
Soltústik-batystan, batystan soǵatyn jeldiń kúshi sekýndyna 15-20 metrge deıin jetpek.
«Shildede aýanyń ortasha aılyq temperatýrasy +19+20°S bolady dep boljanǵan, bul norma. Aıdyń ár onkúndiginde Atlant jáne Qara teńiz aýdandarynan sýyq jáne ylǵaldy aýa massalarynyń basyp kirýi nátıjesinde qysqa merzimge kún sýytady. Oblys boıynsha jaýyn-shashyn, ekpindi jel jáne aýa temperatýrasynyń túnde +7+12°S, kúndiz +17+23°S deıin tómendeýi boljanǵan», - deıdi meteoboljaý bóliminiń basshysy Gúlzat Ǵazızova.
Al Iran men Orta Azııa aýdandarynan ystyq tropıkalyq aýanyń kelýine baılanysty temperatýra aıtarlyqtaı joǵarylamaq.
Termometr baǵany túnde +15+20°S-ke deıin, kúndiz +30+32°S belgisine deıin kóteriledi.
«Jaýyn-shashyn mólsheri shildede oblystyń basym bóliginde normadan artyq bolmaq, jalpy norma - 53-69 mm. Bir aı boıy qysqa merzimdi jańbyr jaýyp, naızaǵaı jıi bolady dep boljanǵan. Tamyz aıynda da jaýyn-shashyn mólsherden artyq 40-53 mm jaýady. Al aýa temperatýrasy qalypty, +17+18°S shamasynda bolady», - deıdi Gúlzat Ǵazızova.
