Soltústik Qazaqstanda saıajaıdaǵy úı órtenip, áıel adam mert boldy
PETROPAVL. QazAqparat – Búgin Petropavlda eki jerde órt tirkelip, bir adam mert bolǵan, dep habarlaıdy QazAqparat tilshisi.
Tótenshe jaǵdaı departamentiniń basshysynyń mindetin atqarýshy Nurlan Atyǵaevtyń aıtýynsha, birinshi órt Muqanov kóshesinde tirkeldi. Eki qabatty úı qyzyl jalynǵa oranǵan. Úıdiń janyndaǵy qurylys tolyǵymen órtenip, úıdiń shatyryna zaqym kelgen. Aldyn ala boljam boıynsha órttiń tutanýyna elektr toǵynyń tuıyqtalýy sebep bolǵan.
Ekinshi órt keshke qaraı «Mıchýrıno» baý-baqsha qoǵamynda bolǵan. Saıajaıdaǵy úıde bolǵan órtti sóndirý barysynda áıel adamnyń máıiti tabyldy. Órttiń jáne áıeldiń óliminiń sebebi anyqtalyp jatyr.
«Ótken aptada oblysta 10 turmystyq órt tirkelgen. Bir adam jaraqat aldy. 11 tamyz kúni Aıyrtaý aýdanyndaǵy Voskresenovka aýylynda eki páterli turǵyn úıde órt bolǵan. Úı ıesi 1-2 dárejeli 7% bas terisiniń, oń bilektiń termııalyq kúıigin aldy. Medıtsınalyq kómek kórsetilgennen keıin ony úıine jiberdi», dedi N.Atyǵaev brıfıngte.
