Soltústik Qazaqstanda «Rýhanı jańǵyrý» jobalaý keńsesi jumys isteýde
Keńse Manash Qozybaev atyndaǵy Soltústik Qazaqstan Memlekettik ýnıversıtetinde ornalasqan. Aýqymdy jobaǵa 10 adam tartylyp otyr. Jobanyń maqsaty - Memleket basshysynyń «Bolashaqqa baǵdar: rýhanı jańǵyrý» atty maqalasyndaǵy basty baǵyttardy iske asyrý. Qumar Aqsaqalov ulttyq qundylyqtardy jandandyrý Elbasy maqalasynyń ózegi ekenin atap ótti.
«Qazirgi tańda aımaqtyq mádenıet men tarıhtyń rólin túsinýde jańa kózqarastyń kerek ekeni anyq. Bizdiń memleket jańa áleýmettik-mádenı ortany qalyptastyra otyra, elge degen súıispenshilikti aldyńǵy qatarǵa qoıý qajet. Týǵan jerge degen mahabbatty sińirý de asa mańyzdy is».
«Rýhanı jańǵyrý» jobalaý keńsesiniń jetekshisi, tarıh ǵylymdarynyń doktory Aqmaral Ybyraevanyń aıtýynsha, jobalaý keńsesi tórt baǵyt boıynsha jumys jasaıdy: «Atameken», «Aqparat tolqyny», «Tárbıe jáne bilim» jáne «Rýhanı qazyna». Bul salalar boıynsha aqparattyq-nasıhat jumystary júrgizilýde. Óńirde 5 dóńgelek ústel, 4 konferentsııa, bir forým, 5 kórme, 11 zertteý ekspedıtsııasy, sondaı-aq fleshmobtar men aýqymdy aktsııalar ótkizildi. Keńse qyzmetkerleri áleýmettik jelilerde de belsendi aqparattyq naýqan júrgizip jatyr.
«Rýhanı qazyna» boıynsha 23 joba júzege asyrylýda. Onyń ishinde «Týǵan jer», «Qazaqstannyń kıeli jerleri» jáne «Qasıetti Qazaqstan» syndy aýqymdy jobalar bar. «Rýhanı qazynanyń» basty maqsaty - turǵyndar arasynda jergilikti tarıh, salt-dástúr jáne mádenıetke degen qyzyǵýshylyqty oıatý. «Tárbıe jáne bilim» boıynsha «Ólketaný», «Otanym - taǵdyrym» jáne «Sanaly azamat» jobalary júzege asady. «Aqparat tolqyny» boıynsha jobalar sany toǵyzǵa jetti. «Atameken» jobasynyń kózdegeni - azamattardy, úkimettik emes uıymdardy, eriktiler, metsenattar, kásipkerler men memlekettik organdardy jergilikti halyqtyń máselelerin sheshýge shaqyrý jáne sony uıymdastyrý. Óńir basshysy «Atameken» jobasyna erekshe mán berip, onyń aıasynda belgili jerlesterdi metsenat retinde tartý kerektigin basa aıtty.
