Soltústik Qazaqstanda Qazaqtany mektebi ashyldy

PETROPAVL. QazAqparat - Petropavl qalasyndaǵy dostyq mektebinde Qazaqtany mektebi ashyldy, dep habarlaıdy QazAqparat tilshisi.

«Qoǵamdyq kelisim» QMM baspasóz qyzmetiniń málimdeýinshe, Qazaqtany jobasy qazaq halqynyń tarıhy, fılosofııasy, ádet-ǵurpy, salt-dástúri men  mádenıetin dáripteýge baǵyttalǵan. Mektep etnomádenı ortalyq ókilderi men «Jańǵyrý joly» jastar qozǵalysynyń kóshbasshylary úshin uıymdastyrylyp otyr.

Atalmysh mektep «Asyl mura»,  Qazaq time, «Halyq murasy», «As dámdi bolsyn!» jáne «Ulttyq oıyndarmen tanysaıyq!» atty bes bólimnen turady.

«Jobanyń ereksheligi - dástúrdi, tarıhty, tildi tanystyrý ǵana emes, sonymen qatar ınteraktıvti sabaqtar ótkizý negizinde qazaq halqynyń mádenıetin boıyna sińirý. Dostyq úıi bazasynda arnaıy jaǵdaı jasalǵan. Kıiz úı stılinde kabınet jasaqtalyp, sheberlik synyptary úshin túrli materıaldar ázirlendi», - dedi baspasóz qyzmetinen.

Qazaqtany mektebindegi sabaqtar apta saıyn, ár jumada júrgizilmek.