Soltústik Qazaqstanda polıtseıler sý basqan aýmaqty kúzetip júr
PETROPAVL. QazAqparat - Qoǵamdyq tártipti kúzetý jáne sý tasqynynyń saldaryn joıý úshin Petropavl ІІB qurama batalony men jol-patrýldik polıtsııasynyń batalony jumyldyryldy, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
SQO ІІD bastyǵy Berik Bilıalov quqyq qorǵaý organdary qyzmetkerleriniń aldyna adam ólimine, turǵyndar qaldyrǵan úılerdi tonaýǵa jol bermeý sekildi tapsyrmalardy qoıdy.
Polıtseılerge arnaıy sý ótpeıtin kostıýmder men rezeńkeden jasalǵan qaıyqtar berildi. Táýlik boıy sý tasqyny ahýalyn baqylaý úshin 1- Zarechnaıa, Zarechnyı jáne Hromzavod kentterine, 10 móltekaýdandaǵy dambaǵa, «Chelıabınsk-Novosıbırsk» aınalma jolyna 10 avtopatrýl qyzmeti qoıyldy.
«Zarechnyı kentinde 3000 adam turyp jatyr. Atys qarýy bar adamdardy esepke alý jumystaryna erekshe nazar aýdaryldy», - dedi SQO ІІD baspasóz qyzmeti.
Polıtseıler turǵyndarǵa sý tasqyny týraly eskertý jumystaryna, adamdardy jáne úı janýarlaryn evakýatsııalaýǵa atsalysty. Petropavlda búgin TJ rejimi jarııalandy. Esil ózenindegi sýdyń deńgeıi ulǵaıýda. Taıaý kúnderi óńirdegi sý tasqynynyń deńgeıi shyrqaý shegine jetýi yqtımal. Qutqarýshylar bul sońǵy 23 jyldyń ishindegi eń iri sý tasqyny dep atap ótti.
