Soltústik Qazaqstanda polıtseı qaýipti jaǵdaıdyń aldyn aldy
PETROPAVL. QazAqparat - Kúre jolda qaıǵyly oqıǵanyń aldyn alǵan soltústikqazaqstandyq polıtseı energetıkalyq kompanııanyń alǵysyna ıe boldy, dep habarlaıdy QazAqparat tilshisi.
Іshki ister departamentiniń baspasóz qyzmeti Tımırıazev AІІB bastyǵynyń orynbasary Narlan Jumabaevtyń jolda qaıǵyly jaǵdaıdyń qalaı aldyn alǵandyǵyn aıtty.
Ol demalys kúni óz sharýasymen Petropavlǵa bara jatqan. Nóser jańbyr quıyp turǵan. Polıtseı kenetten Esil aýdany Zarechnoe aýylyna taıaý mańda jel qulatqan elektr jelisiniń tiregin baıqap qalǵan. Joldy kesip jatqan elektr symdary jeńil kólik deńgeıinde bolǵan.
«Polıtsııa podpolkovnıgi sol jerde shuǵyl apattyq belgini qosqan. Sońynan kele jatqan kólikterdi toqtatyp, apattyq brıgada jetkenge deıin qozǵalysty rettep turǵan. Kólik keptelisin týǵyzbaý úshin ol qalaǵa qaraı ketip bara jatqan kólikterdi qaýipti ýchaskeni aınalyp, qarsy jolaqpen júrgizgen», - dep atap ótti baspasóz qyzmeti.
