Soltústik Qazaqstanda onynshy servıstik ákimdik ashyldy
SQO ákimi baspasóz qyzmetiniń málimetinshe, Beskól aýylynda ashylǵan servıstik ákimdik – «estıtin memleket» qaǵıdaty boıynsha óńirde jumys istep jatqan onynshy front-keńse. Jyl sońyna deıin barlyq aýdandarda «Ashyq ákimdik» ashylmaq.
«Alǵashqy jarty jylda jergilikti atqarýshy organdarǵa 21,5 myńnan astam ótinish túsken. Turǵyndar negizinen turǵyn úı-kommýnaldyq sharýashylyq, jerge qatysty jáne turǵyn úı máselelerimen júgingen. Tek júzi ǵana qaıta ótinish jasaǵan. Laýazymdy tulǵalardyń áreketsizdigine qatysty túsetin shaǵymdar 10% azaıyp, byltyr 112 aryz túsken.
Memlekettik qyzmetshiniń negizgi mindeti – turǵynnyń máselesin eki aıtqyzbaı sheship berý. Alaıda keı máseleni sheshýýge ýaqyt kerek, mundaı jaǵdaıda túsindirý qajet», - deıdi front-keńseniń ashylýyna qatysqan óńir basshysy Qumar Aqsaqalov.
Oblysta ruqsat qujattaryn berý mehanızmi jetildirilip jatyr. Búginde memlekettik organdar bul baǵytta 44 elektrondy qyzmet kórsetedi. Búginde turǵyndar úıden shyqpaı-aq keı ruqsat qujattardy ala alady. Máselen bıyl osyndaı 9 200 qyzmet kórsetilgen.
«Jer qatynastary salasynda bul jumystar «Geoportal» aqparattyq júıesi iske qosylysymen jeńildemek. Buginde bıýdjettiń ınteraktıvti kartasy jumys isteıdi. Aqparattyq servıste 437 mlrd teńgeniń 2 634 bıýdjeti jarııalanǵan. Nátıjesinde ár turǵyn bıýdjetten bólingen qarajattyń ár tıynyn qadaǵalaı alady», - dedi oblys ákimi.
Al qoǵamdyq baqylaýdy kúsheıtý maqsatynda oblystyq ákimdiktiń saıtynda «Halyqtyq baqylaý» portaly ashylǵan. Oǵan adamdar qurylys, jóndeý jáne taǵy basqa jumystar barysynda jiberilgen olqylyqtar jaıynda foto-beınematerıaldardy jibere alady.
Bul baǵytta «Qyzyljar – adaldyq alańy» jobalyq keńsesi de nátıjeli jumys isteýde. Monıtorıng toby kepildik qyzmettegi 69 jol ýchaskesiniń sapasyn tekserdi.
