Soltústik Qazaqstanda Naýryz kúnderi 600-den astam is-shara ótedi
PETROPAVL. QazAqparat - Soltústik Qazaqstan oblysynda Naýryz merekesine oraı 600 is-shara josparlandy, dep habarlaıdy «QazAqparat» HAA tilshisi oblys ákiminiń baspasóz qyzmetine silteme jasap.
Halyqtyq serýender Petropavldyń Ortalyq alańynda 21 naýryz kúni bastalady. Qala turǵyndary men qonaqtary naýryz kójeden, baýyrsaqtardan, palaýdan tegin dám tatady. Dostastyq úıinde etnomádenı birlestikterdiń qatysýymen merekelik baǵdarlamalar, «Naýryz kýbogy» KVN-iniń oblystyq festıvali, Sábıt Muqanov atyndaǵy qazaq mýzykalyq drama teatrynda merekelik kontsert josparlanǵan. Elimizdiń 9 oblysynan keletin sýyryp salma aqyndardyń qatysýymen respýblıkalyq aıtys pen kıiz úı konkýrsy ótkiziledi.
Bilim berý mekemelerinde synyp saǵattary, tańerteńgilikter, saltanatty jınalystar men Naýryz meıramy taqyrybynda kontsertter josparlanǵan. Mekemelerde, uıymdarda jáne oblystyq kásiporyndarda soǵys jáne eńbek ardagerleriniń, qurmetti azamattardyń, ǵylymı jáne shyǵarmashylyq zııaly qaýym ókilderiniń qatysýymen saltanatty jınalystar ótedi.
Qaıyrymdylyq aktsııasy aıasynda múmkindigi shekteýli balalardy, ata-anasynyń qamqorlyǵynan aıyrylǵan jáne jetim balalardy, az qamtylǵan otbasylardan shyqqan balalardy «Neptýn» akvaparkine jáne attraktsıondarǵa tegin alyp barý kózdelgen.
20 ónerkásippen aınalysatyn kásiporyndar men kóterme fırmalar azyq-túlikterdi tómen baǵada satýdy uıymdastyrady.
22 naýryz kúni etnoaýyldardyń qatysýymen negizgi merekelik is-sharalar Ortalyq alańda jalǵasyn taýyp, sahnalyq jáne sporttyq alańdar uıymdastyrylady.
23 naýryz kúni kórermenderdiń nazaryna «Armysyń áz Naýryz!» atty kontserttik-oıyn-saýyqtyq baǵdarlama men balalarǵa arnalǵan «Saltymyzdy saqtaıyq» teatrlandyrylǵan-tanymdyq baǵdarlama usynylady.
Oblystyń barlyq 13 aýdanynda sporttyq is-sharalar, sonyń ishinde grek-rım kúresinen oblystyq chempıonaty, shańǵy jarysynyń birinshiligi, basketboldan oblystyq chempıonat, kórkem gımnastıka, ulttyq sport túrinen jarystar josparlanǵan.
